फाखेल-फर्पिङ सडक २० दिनलाई एकतर्फी

१० फागुन, हेटौँडा । छोटो दुरीको सडक खण्ड हेटौँडा–फाखेल–फर्पिङ २० दिनका लागि एकतर्फी गरिएको छ । सडक स्तरोन्नती गर्नुपर्ने भएपछि यो सडक खण्ड एकतर्फी गरिएको हो ।

प्रदेश पूर्वाधार विकास कार्यालय, मकवानपुरले एक सूचना जारी गर्दै १० गते शनिवारदेखि २० दिनका लागि सवारी साधनको आवागमन एकतर्फी गरिएको जानकारी दिएको छ ।

कार्यलयले हेटौँडा–फाखेल–हुमानेभञ्ज्याङ आयोजनाको मकवानपुर जिल्लाअन्तर्गत इन्द्रसरोवर गाउँपालिकाको कलंकीदेखि महालक्ष्मीखोलासम्म सडक ढलान गर्नुपर्ने भएकाले सवारी साधन आवागमन एकतर्फी गरेको जनाएको छ ।

इन्द्रसरोवर गाउपालिका वडा नम्बर ४ र २ को सिमा क्षेत्रमा पर्ने माहलक्ष्मीखोलामा पक्कि पुल निर्माणको काम पनि भइरहेको छ ।
सडक ढलानका क्रममा सवारी साधनको चापका कारण निर्माण कार्यमा असहजता हुने भएकोले सवारी एकतर्फी सञ्चालन गर्ने निर्णय गरिएको प्रदेश पूर्वाधार विकास कार्यालय, मकवानपुर प्रमुख सुजन भण्डारीले जानकारी दिए ।

हेटौँडा–फाखेल–हुमाने सडकबाट हेटौँडा–काठमाडौं जाने गरी एकतर्फी सवारी चलाउनुपर्ने भएकाले आवश्यक समन्वय गरिदिन काठमाडौं र मकवानपुर जिल्ला प्रशासन कार्यालयहरुलाई आग्रह गरिएको छ ।

यस क्रममा हेटौँडाबाट काठमाडौंतर्फ जान हेभी–सिस्नेरी–दक्षिणकालीलाई वैकल्पिक रुटका रुपमा प्रयोग गर्न सकिने उल्लेख गरिएको छ ।

यता महालक्ष्मी–चखेल–मातातीर्थ मार्ग पनि स्तरोन्नतिका क्रममा गत आइतबारदेखि डेढ महिनाका लागि बन्द छ । मकवानपुरको इन्द्रसरोवर गाउँपालिका वडा नम्बर ५ अन्तर्गत महालक्ष्मी दोभान–घट्टेखोला–चखेल हुँदै मातातीर्थ जोड्ने सडकअन्तर्गतको देउराली मातातीर्थ खण्डको केही स्थानको मोडहरुमा सडक ढलानको काम भइरहेको छ ।

फोटो सौजन्यः आस बहादुर ब्लोनको फेसबुक पेजबाट