झाँक्रीहरुको गोम गुफा (तपस्या) सकियो

१२ फागुन, हेटौँडा । हेटौंडा–१४ स्थित श्री छोर्बा बोम्बो तथा डम्फु सेलो संस्था कालोपानीका गुफा बसेका झाँक्रीहरु आईतवार बाहिर निस्किएका छन् । सेले होईकर वोन्वो रिम ठिम अनुसार ७ दिने गोम गुफा (तपस्या) मा बसेका झाँकीहरु बाहिर निस्किएका हुन् ।

आईतवार एक कार्यक्रमको आयोजना गर्दै झाँकीहरु बाहिर निस्किएका हुन् । श्री छोर्बा बोम्बो तथा डम्फु सेलो संस्था कालोपानी ब्यबस्थापन समितिका अध्यक्ष तारा बहादुर बम्जनको सभाध्यक्षता भएको कार्यक्रममा हेटौंडा उपमहानगरपालिकाका मेयर मिना लामाको प्रमुख आतिथ्यता रहेको थियो ।

कार्यक्रमको सम्बोधन गर्दै मेयर लामाले सँस्कृतिलाई जगेर्ना गर्न झाँक्रीहरुको ठुलो योगदान रहेको बताईन् । ८० वर्षभन्दा माथिका नागरिकहरु अझै पनि आफ्नो सस्कृति जोगाउन लागिपरेको भन्दै मेयर लामाले धन्यवाद व्यक्त गरिन् ।

नेपालमा विभिन्न जातजाति बसोबास गर्ने सबैको आ–आफ्नै संस्कृति रहेको भन्दै मेयर लामाले आफ्नो संस्कार आफैले संरक्षण गर्नपर्ने बताईन् । उनले झाँक्री संघ आवश्यक सामग्रही उपलब्ध गराउने र संघले निर्माण गर्न लागेको डम्फु पार्क बनाउन उपमहानगरले सहयोग गर्ने प्रतिवद्धता व्यक्त गरिन् ।

५ गतेदेखि सुरु भएको उक्त गुफा तपस्यामा १० जना झाँकीहरु बसेका थिए । गुफामा बस्ने झाँकीहरुले मन्त्र जपगरी तपस्या गरेका थिए । उनीहरुलाई भाँकीका गुरु मदन थिङले प्रशिक्षण गराएका थिए ।

उक्त गुफा ध्यान बसेर निस्किएपछि झाँकीको गुरु भएको प्रमाणित हुने श्री छोर्बा बोम्बो तथा डम्फु सेलो संस्था कालोपानीका अध्यक्ष सार्की मान हिमडुङले जानकारी दिए । संस्कृतिको जगेर्ना गर्न २०६९ सालमा स्थापना भएको उक्त संस्थाले पछिल्लो समय हेटौंडामा हुने हरेकजसो कार्यक्रमहरुमा झाँकी नाच देखाउँदै आएका छन् ।।