कैलाशमा अध्यक्ष कप फुटबल सुरु, उद्घाटन खेलमा वडा नम्बर ७ र ४ विजयी

१४ फागुन, हेटौँडा । बुधबारबाट सुरु भएको कैलाश गाउँपालिका स्तरीय अन्तर वडा तेस्रो अध्यक्ष कप फुटबल प्रतियोगितामा वडा नम्बर ४ र ७ ले विजयी सुरुवात गरेका छन् । गाउँपालिकाको आयोजना तथा कैलाश गाउँपालिका खेलकुद विकास समितिको व्यवस्थापनमा प्रतियोगिता सुरु भएको हो ।

वडा नम्बर ९ नामटारमा रहेको खेलमैदानमा भएको उद्घाटन खेलमा ७ नम्बर वडाले वडा नम्बर १ लाई २–१ गोल अन्तरले पराजित गर्दै विजयी सुरुवात गरेको हो । वडा नम्बर ७ को जितका लागि सन्तोष मुक्तान र सागर चेपाङले समान एक एक गोल गरे । यस्तै वडा नम्बर १ का तर्फबाट शिशिर नेगीले एक गोल फर्काए । खेलको म्यान अफ द म्याच वडा ७ का सागर चेपाङ घोषित भए । उनलाई गाउँपालिका अध्यक्ष लोकबहादुर मुक्तानले ट्रफि प्रदान गरेका थिए ।

यस्तै बुधबार नै भएको वडा नम्बर २ र ४ बीचको खेलमा वडा नम्बर ४ विजयी भएको छ । निर्धारित समयमा १–१ गोलको बराबरी भएपछि खेलको निर्णण टाइब्रेकरबाट लिइएको थियो । टाइब्रेकरमा वडा नम्बर ४ ले २ लाई ५–४ गोल अन्तरले पराजित ग¥यो । दोस्रो खेलको म्यान अफ द म्याच वडा नम्बर ४ का गोलरक्षक सबल प्रजा घोषित भए ।

नकआउट चरणमा खेलाईएको खेलमा विहीबार चार खेल हुने आयोजकले जनाएको छ । पहिलो खेल वडा नम्बर १० र ६ बीच हुनेछ भने दोस्रो खेल वडा नम्बर ५ र ३ बीच हुने छ । यस्तै तेस्रो खेल वडा नम्बर ७ र ९ बीच हुँदा चौथो खेल वडा नम्बर ४ र ८ बीच हुने समितिका संयोजक मोहन वाईवाले जानकारी दिए । कार्यक्रममा प्रमुख प्रशासकीय अधिकृत अमुल श्रेष्ठ, वडा नम्बर २ का अध्यक्ष राजेन्द्र घिसिङ, वडा नम्बर ३ का अध्यक्ष देवलाल बल, वडा नम्बर ७ का अध्यक्ष उदास कुमार भोलन, वडा नम्बर ९ का अध्यक्ष भुवन घलान लगायतको अतिथ्यता रहेको थियो ।

मैत्रीपूर्ण खेलमा कैलाश विजयी
यस्तै बुधबार नै कैलाश गाउँपालिका र मकवानपुरगढी गाउँपालिकामा कार्यरत कर्मचारीबीच भएको मैत्रीपूर्ण फुटबल खेलमा कैलाश गाउँपालिका विजयी भएको छ । कैलाश गाउँपालिकाको आयोजनामा भएको खेलमा १–० गोल अन्तरले कैलाश विजयी भएको हो ।

कैलाशका रोजगार संयोजक हस्तराम नेगीले गरेको गोलनै निर्णायक बन्यो । विजेतालाई ट्रफि र मेडल, उपविजेतालाई मेडल प्रदान गरिएको थियो । मैत्रीपूर्ण फुटबलमा खेलकुद विकास समितिका संयोजक मोहन वाईवाको अध्यक्षता तथा गाउँपालिका अध्यक्ष लोकबहादुर मुक्तानको प्रमुख आतिथ्यतामा प्रतियोगिता गराइएको थियो ।

कार्यक्रममा पालिका उपाध्यक्ष बालकुमार मल्ल, प्रमुख प्रशासकीय अधिकृत अमुल श्रेष्ठ, मकवानपुरगढीका वरिष्ठ लेखा अधिकृत रामकृष्ण श्रेष्ठको नेतृत्वमा पालिकामा कार्यरत कर्मचारीहरुको सहभागिता रहेको थियो ।