६ किलो अफिम र गाँजासहित सुमो र चालक नियन्त्रणमा

१५ फागुन, हेटौँडा । मकवानपुर प्रहरीले जिल्लाको मनहरीबाट लागूऔषध ठूलो मात्रामा अफिम र गाँजासहित सुमो गाढी र सुमोका चालकलाई नियन्त्रणमा लिएको छ । प्रहरीले ६ किलो १६० ग्राम अफिम, १२७ किलो ९४० ग्राम गाँजाको धुलो (पोल्याण्ड) र ३१ किलो ५६० ग्राम गाँजा नियन्त्रणमा लिएको हो ।

गत १० फागुनमा इलाका प्रहरी कार्यालय मनहरी र प्रहरी चौकी सुनाचुरीबाट खटिएको संयुक्त प्रहरी टोलीले उक्त परिमाणको लागुऔषध र सुमो गाडीसहित चालकलाई पक्राउ गरेको हो । पक्राउ पर्नेमा सिन्धुपाल्चोक जिल्लाको बाह्रबिसे नगरपालिका– ९ घर भई काठमाडौं महानगरपालिका–पेप्सीकोला बस्ने ३८ वर्षका लालबहादुर तामाङ रहेका छन् ।

मकवानपुर प्रहरी प्रवक्ता डिएसपी श्यामु अर्यालका अनुसार मकवानपुरको मनहरी– ६ नयाँ वस्तीस्थित पूर्वपश्चिम लोकमार्गमा साईड लगाई रोकी राखेको बा ७ च ७०१८ नम्बरको सुमोलाई शंका लागि जाँच गर्दा उक्त परिमाणको लागुऔषध फेला परेको हो । डिएसपी अर्यालले उक्त सुमोको पछाडीको सिट मुनि लुकाई छिपाई गरी राखिएको अवस्थामा लागुऔषध फेला परेको जानकारी दिए ।

लागुऔषध र सुमो नियन्त्रणमा लिने क्रममा फरार भएका तामाङलाई भने प्रहरीले १३ फागुनमा पक्राउ गरी बिहीवार सार्वजनिक गरेको हो । सुमो चालक तामाङलाई खोजतलासको क्रममा काठमाडौंको गोकर्णेश्वर नगरपालिका–४ स्थित जोरपाटीबाट नियन्त्रणमा लिइएको प्रवक्ता अर्यालले बताए ।

लेवटबाट ११ किलो ४२० ग्राम गाँजासहित दिपक ओझा पक्राउ
यस्तै, प्रहरीले हेटौंडा– ३ बसामाडी लेवटबाट ११ किलो ४२० ग्राम लागुऔषध गाँजासहित ४४ वर्षीय दिपक ओझालाई पक्राउ गरेको छ । लेवट प्रहरी चौकी अगाडी पूर्वपश्चिम लोकमार्गमा सवारी साधन जाँच गर्ने क्रममा चितवनबाट हेटौंडातर्फ आउँदै गरेको बा ४ ख ३९३५ नम्बरको यात्रुबाहक बसमा सवार मनहरी– ३ हाँडीखोलाका ओझा पक्राउ परेका हुन् ।

प्रहरीले शंका लागि उनले बोकेका झोला खानतलासी गर्दा उक्त झोलामा ११ किलो ४२० किलो लागूऔषध गाँजा फेला परेको प्रहरीले जनाएको छ । लागूऔषध पक्राउ परेकाहरुलाई अदालतबाट थप म्याद लिई अनुसन्धान प्रक्रिया अगाडी बढाइएको प्रवक्ता आर्यालले बताए ।