स्वकीय सचिव मृत्यु प्रकरणः प्रदेशका सहकारीमन्त्रीको राजीनामा माग

१५ फागुन, हेटौँडा । बागमती प्रदेशका सहकारी तथा गरिबी निवारणमन्त्रीका स्वकीय सचिवको मृत्युको विषयलाई लिएर प्रदेशमा प्रतिपक्षीमा रहेका तीन दलले मन्त्रीको राजीनामा मागेका छन् । प्रदेश सभाको प्रमुख प्रतिपक्षी दल माओवादी केन्द्र तथा प्रतिपक्षी दलहरू राष्ट्रिय प्रजातन्त्र पार्टी र एकीकृत समाजवादीले विज्ञप्तिमार्फत घटनाको निष्पक्ष छानबिनका लागि सहकारी तथा गरिबी निवारणमन्त्री मदुकुमार श्रेष्ठले राजीनामा दिनुपर्ने माग गरेका हुन् ।

मन्त्री श्रेष्ठका स्वकीय सचिव, धुनीबेँशी नगरपालिका– ९, धादिङनिवासी रवि थापाले १३ फागुनमा काठमाडौंको कलंकीस्थित साथीको घरमा मृत फेला परेका थिए । उनले आत्महत्या गरेको प्रारम्भिक अनुसन्धानबाट खुलेको छ । स्वकीय सचिव थापाले आत्महत्या गर्नुअघि लेखेको सुसाइड नोट र सहकारीकासम्बन्धी सार्वजनिक भएको अडियोमा मन्त्री श्रेष्ठको नाम आएको र स्वकीय थापाको आत्महत्या बाध्यात्मक परिस्थितिमा भएको देखिएकोले मन्त्री श्रेष्ठले राजीनामा दिएर छानबिनमा सघाउनुपर्ने उनीहरूको माग छ ।

तीन दलका सचेतकहरूले हस्ताक्षर गरेको विज्ञप्तिमा स्वकीय सचिव थापाको मृत्यु बाध्यात्मक देखिएकाले निष्पक्ष छानबिनका लागि माग गर्दै मन्त्रीको राजीनामा माग गरेको उल्लेख गरिएको छ । ‘स्वकीय सचिवको मृत्युपछि बाहिरिएको अडियो र सुसाइड नोटमा सहकारीमन्त्रीलगायत अन्य नेताहरूको समेत नाम सुनिएको छ । बाध्यात्मक परिस्थितिमा आत्महत्या भएको भन्ने आसयका समाचारहरू पनि आएका छन् । यसकारण मन्त्रीज्यूले राजीनामा दिएर छानबिनमा मार्गप्रशस्त गर्नुपर्छ,’ विज्ञप्तिमा उल्लेख गरिएको छ ।

घटनाको विषयमा गम्भीरतापूर्वक विचार गर्न माग गर्दै प्रतिपक्षी दलहरूले घटनाको प्रदेश स्तरमै छानबिन गर्न संसदीय छानबिन समितिसमेत बनाउन माग गरेका छन् । यसैगरी उनीहरूले प्रदेश सभाको बैठक अविलम्ब आह्वान गर्न पनि भनेका छन् । ‘प्रदेश सभाको बैठक अविलम्ब सञ्चालन गरी स्वकीय सचिव थापाको मृत्युको छानबिन गर्न सर्वदलीय संसदीय छानबिन समिति निर्माण गर्न माग गर्दछौँ,’ उनीहरूले भनेका छन् ।