दोस्रो राष्ट्रिय निर्माण तथा व्यापार महोत्सव सकियो, एकलाख बढीले गरे अवलोकन

१८ फागुन, हेटौँडा । निर्माण व्यवसायी संघ मकवानपुरको आयोजनामा फागुन ६ गतेबाट सुरु भएको दोस्रो राष्ट्रिय निर्माण तथा व्यापार महोत्सव सम्पन्न भएको छ । हेटौँडा १० स्थित टीसीएन चौरमा भएको महोत्सवमा एकलाखले अवलोकन र ६ करोड बराबरको कारोवार भएको निर्माण व्यवसायी संघ मकवानपुरका अध्यक्ष बालगोपाल कंडेलले बताए ।

उनले महोत्सवबाट बचेको रकमलाई निर्माण व्यवसायी संघको नयाँ भवन निर्माणमा प्रयोग गरिने जानकारी दिए । महोत्सवमा निर्माण क्षेत्रमा प्रयोगमा आएका अत्याधुनिक उपकरण र निर्माण सामग्रीको प्रदर्शनीसँगै विक्रीलाई जोड दिइएको उनको भनाई थियो । महोत्सवको माध्यमबाट निर्माण सामग्री उद्योगी, विक्रेता र उपयोगकर्ताबीच सोझो सम्पर्क हुनुका साथै यसबाट व्यवसाय वृद्धिसँगै उत्पादित वस्तुहरुको बजार प्रवद्र्धन भएको उनले दावी गरे ।

महोत्सव समापन कार्यक्रममा निर्माण व्यवसायी महासंघका अध्यक्ष रवि सिंहको प्रमुख आतिथ्यता रहेको थियो । प्रमुख अतिथि सिंहले निर्माण व्यवसायीहरु अहिले राज्यका कारण पिडीत भएको बताए । उनले निर्माण कार्यको समयमा सिमेन्ट, छड लगायतको सामग्रीमा भएको अस्वाभाविक मूल्यवृद्धि तथा काम गरेको भुक्तानी नपाउँदा व्यवसायी पिडीत भएको दावी गरे ।

निर्माण सामग्रीमा कृत्रिम अभाव सिर्जना गरेर मूल्यवृद्धि गरिएको आरोप लगाउँदै उनले यसमा राज्यले निर्माण व्यवसायीलाई सहयोग नगरेको भन्दै गुनासो गरे । ‘निर्माण सामग्रीमा भएको अस्वभाविक मूल्यवृद्धिले निर्माण व्ययवसायी मारमा छन,’ उनले भने, ‘ सरकार काम गरेको पैसा दिँदैन । यस्तो अवस्थामा अहिले निर्माण व्यवसायीले कसरी काम गर्न सक्छन् र?’

आर्थिक गतिविधिलाई चलायमान बनाउन महोत्सव सफल भएको भन्दै उनले निर्माण व्यवसायी संघ मकवानपुरको प्रशंसा गरे । निर्माण व्यवसायीहरु सामाजिक उत्तरदायित्व वहन गर्न पनि सक्षम छ भन्ने कुरा महोत्सवबाट पुष्टी भएको उनको भनाई थियो ।