माझी समुदायको लदी पर्व २० गते मकवानपुरमा पनि मनाइने

१८ फागुन, हेटौँडा । नेपाल माझी उत्थान संघको आयोजनामा यही फागुन २० गते मकवानपुरको बकैया गाउँपालिकामा लदी पर्व मनाइने भएको छ । २० गते विहान ११ बजेदेखि बकैयाको ६ नम्बर वडास्थित जुइनामा बागमती प्रदेशका मुख्यमन्त्री बहादुरसिंह लामाको प्रमुख आतिथ्यतामा लदी पर्व मनाउन लागिएको आयोजकले जानकारी दिएको छ ।

लदी पर्वको कार्यक्रमको तयारीलाई तीव्र पारिएको आयोजकले जनाएको छ । लदीको अवसरमा देशैभरीका माझी समुदायले नजिकका नदी खोलामा गएर भव्य रुपले नदीखोलाको पुजा गर्ने गर्दछन् । माझीहरुको सघन बस्ती भएका स्थानीय तहहरुले सार्वजनिक विदा समेत दिने गरेका छन् । बागमती प्रदेश सरकारले समेत गत बर्ष र यो वर्ष पनि माझी समुदायहरुलाई सार्वजनिक विदा दिने घोषण गरिसकेको छ ।

नेपाल माझी उत्थान संघ केन्द्रीय समितिको आयोजनामा बकैया ६ मा लदी पर्व मनाउन लागिएको केन्द्रीय अध्यक्ष चिनीमाया माझीले जानकारी दिइन् । नेपाल सरकारले सूचीकृत गरेको ५९ आदिबासी जनजातीमा माझी पनि रहेको छ । खोला तथा नदी किनारमा बसोबास गर्ने यो जाती माछा मार्ने, डुङ्गा चलाएर जिविकोपार्जन गर्ने जातीको रुपमा चिनिएका छन् ।

यो जातीको आफ्नै भाषा, धर्म, संस्कार संस्कृति, भेषभुषा, रहनसहन र सामाजिक परम्परा रहेको अध्यक्ष माझीले बताइन् । २०७८ सालको जनगणना अनुसार नेपालमा माझीको जनसंख्या १ लाख ११ हजार ३५२ रहेको छ । माझीहरुले हिन्दुहरुको सिको गरेर दशैँ तिहार लगायतका चाडपर्व समेत मनाउने गरेको उनले बताइन् ।

ऐतिहासिक महत्वको हिसावले लदी माझीहरुमो प्रमुख चाड भएको जानकारी दिइएको छ । स्थानीय रुपमा जहाँ जुन खोला नदी छ त्यसलाई पुजा गरेर चाडको रुपमा मनाउने गरेको पत्रकार सम्मेलनमा जानकारी दिइएको छ । माझीहरुको साझा संस्था नेपाल माझी उत्थान संघको २०६५ साल माघ २८ गतेको केन्द्रीय समितिको बैठकले यसलाई राष्ट्रिय चाड घोषण गरेको हो ।