१
२८ फागुन, हेटौँडा । भूमि सम्बन्धी समस्या समाधानका लागि भूमि आयोग मकवानपुरले आफ्नो अभियानलाई तीव्र दिएको छ । मकवानपुरको बागमती गाउँपालिकाबाट सुरु भएको आयोगको अन्तरक्रिया तथा छलफल कार्यक्रम बुधबार राक्सिराङ गाउँपालिकामा गरिएको छ ।
यसअघि आयोगले मकवानपुरको बागमती गाउँपालिका र थाहा नगरपालिकामा अन्तरक्रिया गरिसकेको छ । राक्सिराङ गाउँपालिकाको कार्यालय चैनपुरमा भएको अन्तरक्रिया एवम् छलफल कार्यक्रममा भूमि समस्या समाधान आयोग मकवानपुरका अध्यक्ष बलराम बलले मकवानपुरको विकट भनिएको यो गाउँपालिकाका बासिन्दाको समास्या समाधानमा भूमि आयोगले काम गर्ने बताए ।
जनतालाई आश्वासन मात्र हैन कामनै गर्नेगरी हाम्रो समितिले काम गर्नेछ, आयोगका अध्यक्ष बलले भने ‘हाम्रो समितिले काम गरेपछी जिल्लामा अर्को भूमि समस्या समाधान आयोगको गठन गरिरहनु पर्ने अवस्था आउँदैन ।’ आयोगले गरेको काममा गाउँपालिका सहित सम्पूर्ण वडातहबाट साथ र सहयोग हुनुपर्ने उनले बताए । तयार भएका फाईलहरु समयमानै आयोगमा पठाउने व्यवस्था मिलाउन उनले जनप्रतिनिधिहरुलाई अनुरोध समेत गरे ।
कार्यक्रममा राक्सिराङ गाउँपालिकाका अध्यक्ष राजकुमार मल्लले प्रमाणिकरण भएका फाइलहरु अड्केर बसेको धेरै भयो अब यस्तो अवस्था नआएर जनतालाई आयोगले सहज वातावरण बनाइदिनुपर्ने बताए । ‘राक्सिराङ मकवानपुरको विकट क्षेत्रमा छ,’ अध्यक्ष मल्लले भने, समस्या धेरै छ । चाँडै समाधान गर्न आयोगले आफ्नो काम सुरु गरोस हामी पालिका र वडाबाट फाइल चाँडै पठाउनेछौं ।’
छुट जग्गा दर्ता कायम गर्न भूमि समस्या समाधान आयोगले २ पटक ३५ दिने सूचना समेत प्रकाशित गरिसकेको र अझैपनि छुट जग्गाहरु दर्ता गर्न बाँकी रहेको हुँदा अर्को सूचना प्रकाशित गर्नको लागि समन्वय गरिदिन समेत अध्यक्ष मल्लले अनुरोध गरे ।
राक्सिराङ गाउँपालिकामा भएका ९ वटा वडाहरुबाट प्रमाणिकरण भएका फाइलहरुमध्ये भूमिहिन दलित ३३ जना, भूमिहिन सुकुम्बासी ३५० जना र अव्यवस्थित सुकुम्बासी १३०१ गरी १६८४ परिवारको पहिचान भएको भूमि समस्या समाधान आयोग मकवानपुरका सदस्य कविन सांगामीले जानकारी दिए ।
अन्तरक्रिया कार्यक्रममा भूमि आयोग मकवानपुरका विज्ञ सदस्य अर्जुनप्रसाद चौलागाई, सदस्य डिल माया घर्ती, संविधानसभा सदस्य गोविन्दराम चेपाङ, मालपोत कार्यालय मकवानपुरका प्रमुख रघुवंश कडेंल, नापी कार्यालय मकवानपुरका प्रमुख खीम बहादुर राना, वडा अध्यक्षहरु र पालिकामा क्रियाशील राजनीतिक दलका प्रमुख एवम् प्रतिनिधि लगायत स्थानीयहरुको उपस्थिति रहेको थियो ।
Hetauda Live ले समाचार, विचार, मनोरन्जन, खेल, विश्व, सुचना प्रविधि, भिडियो तथा जीवनका बिभिन्न आयामका समाचार र विश्लेषणलाई समेट्छ । मर्यादित समाज विकास र उन्नतीको पथमा अगाडी बढ्ने उदेश्यका साथ आवाज बिहीनहरुको आवाज बनेर बाहिर प्रस्फुटन हुन नसकेको सत्य तथ्य, निष्पक्ष समाचार संप्रेसण गर्न सधै प्रतिबद्धछौ । भ्रस्टाचार, अनियमितता सम्बन्धी कुनै अडियो भिडियो तपाई संग छ भने हामीलाई उपलब्ध गराउनुहोस र जिम्मेवार नागरिकको दायित्व पुरा गर्नुहोला, श्रोत गोप्य राखिने छ ।
