हेटौँडा–४ मा भेटिएको प्रेसर कुकरमा बिस्फोटक पदार्थ नभएको पुष्टि

२९ फागुन, हेटौँडा । हेटौँडा उपमहानगरपालिका वडा नम्बर ४ हुप्रचौ नजिकै बिहीबार साँझ फेला परेको शंकास्पद प्रेशसर कुकरमा विस्फोटक पदार्थ नभएको पुष्टि भएको छ । सेनाको डिस्पोजल टोलीले डिस्पोज गर्ने क्रममा उक्त कुकरमा केहिपनि फेला नपरेको मकवानपुर प्रहरीले जनाएको छ ।

हेटौँडा ४, हुप्रचौरस्थित शितलमहल चोक नजिकै सडकमा बेवारिसे अवस्थामा प्रेसर कुकर फेला परेपछि स्थानीय त्रसित भएका थिए । मकवानपुर प्रहरी प्रवक्ता डिएसपी श्यामु अर्यालले उक्त बेवारिसे प्रेसर कुकरमा कुनैपनि किसिमको विस्फोटक पदार्थ फेला नपरेको जानकारी दिए ।

उनका अनुसार स्थानीय सिर्जना पौडेलको घर अगाडि सडक छेउको बिजुलीको पोलसँगै फेला परेको प्रेसर कुकुरलाई नेपाली सेनाको डिस्पोजल टोलीले डिस्पोज गरेको छ ।