मकवानपुरका प्रमुख तीन क्याम्पसमा अनेरास्ववियु र नेविसंघको प्यानल नै विजयी

६ चैत, हेटौँडा । मकवानपुरका प्रमुख तीन क्याम्पसमा अनेरास्ववियु र नेविसंघको प्यानल विजयी भएको छ । मकवानपुरको सबैभन्दा ठूलो क्याम्पस मकवानपुर बहुमुखी क्याम्पसमा अनेरास्ववियु र नेविसंघको संयुक्त प्यानल विजयी भएको छ ।

स्ववियु सभापतिमा अनेरास्ववियुका प्रसिद्ध रेग्मी निर्वाचित भएका छन् । उनले अखिल (क्रान्तिकारी)का छोइसाङ लामालाई १९९ मतको अन्तरले पराजित गरे । रेग्मीले ७०६ मत प्राप्त गर्दा, उनका प्रतिस्पर्धी लामाले ५०७ मत पाएका छन् । लामा यसअघि स्ववियुका अध्यक्ष थिए । कुल २ हजार ६९८ मतदाता रहेको मकवानपुर बहुमुखी क्याम्पसमा जम्मा एक हजार २८१ मत खसेको थियो ।

यस्तै सचिव पदमा नेविसंघका उत्सव ढुंगाना निर्वाचित भएका छन् । उनले ७११ मत प्राप्त गरेर विजयी हुँदा उनका निकटतम प्रतिस्पर्धी क्रान्तिकारीका दिपेश कार्की ५४४ मत पाए । कोषाध्यक्षमा अनेरास्ववियुका निर्दोष लुइँटेल निर्वाचित भए । उनले ७०४ मत प्राप्त गरे । यसैगरी स्ववियुको सदस्य पदमा पनि अनेरास्ववियु–नेविसंघ प्यानलकै उम्मेदवारहरू निर्वाचित भएका छन् । निर्वाचित हुनेहरूमा मनोज घलान, उमेश चौधरी, दिवस चापागाईँ, साजिर अन्सारी, कृसन थिङ, मन्दीप थापा, विवश अर्याल, र अतित अधिकारी छन् ।

हेटौँडाको वन विज्ञान क्याम्पसमा नेविसंघका भट्ट विजयी

यता स्वतन्त्र विधार्थी युनियन (स्ववियु) निर्वाचन अन्तर्गत हेटौँडाको वन विज्ञान क्याम्पसमा नेविसंघ र अनेरास्ववियुको प्यानलबाट नेविसंघका श्यामराज भट्ट निर्वाचित भएका छन् । ३७२ जना मतदान प्रक्रियामा सहभागी भएका थिए । भट्ट २४६ मतसहित विजयी भएका हुन् । उनले आफ्ना प्रतिस्पर्धी अनेरास्ववियु (क्रान्तिकारी)का छत्र शाहीलाई १२८ मतले पछि पारे । शाहीले ११८ मत ल्याए ।
यस्तै स्ववियुको सचिवमा नेविसंघ र अनेरास्ववियुको प्यानलबाट अनेरास्ववियुका सुगम भुषाल क्षेत्री विजयी भए उनले २६७ मत पाउँदा उनका निकटतम प्रतिस्पर्धी अनेरास्ववियु (क्रान्तिकारी)का रमेशसिंह बोहराले १०१ मत प्राप्त गरे । यस्तै कोषाध्यक्षमा पनि नेविसंघ र अनेरास्ववियुको प्याबाटै नेविसंघकी पूर्णिमा पन्त १६७ मतसहित विजयी भइन् । उनकी प्रतिस्पर्धी क्रान्तिकारीकि निरुता श्रेष्ठले १०२ मत ल्याइन् । स्ववियुका सदस्यतर्फ पनि गठवन्धनकै युनिशा धामी, विनय तिमल्सिना, रोहन केसी, जष्टिना श्रेष्ठ र किरणकुमार रावल विजयी भए ।

हेटौँडा क्याम्पसमा अनेरास्ववियुका अभि मैनालीको प्यानल नै विजयी

हेटौँडा क्याम्पसको स्वतन्त्र विद्यार्थी युनियन (स्ववियु) अध्यक्षमा अनेरास्ववियुका अभि मैनाली दोस्रो कार्यकालका लागि निर्वाचित भएका छन् । यस क्याम्पसमा अनेरास्ववियुको प्यानल नै विजयी भएको छ । यहाँ अनेरास्ववियु र नेविसंघबिच गठबन्धन भएको थियो । बुधबार बिहान सम्पन्न मतगणना अनुसार कुल खसेको ३७४ मतमध्ये २५१ मतसहित मैनाली विजयी भएका हुन् । अध्यक्ष पदका अर्का प्रत्यासी अखिल क्रान्तिकारीका दीपक वाईबाले ११९ मत प्राप्त गरे ।

स्ववियुमा मैनालीकै प्यानलबाट पदाधिकारीहरू निर्वाचित भएका छन् । सचिवमा गणेश तिमल्सिना २७१ मतसहित निर्वाचित हुँदा उनका निकटम प्रतिस्पर्धी अखिल (क्रान्तिकारी) का ईश्वर ढुङगेलले ९१ मत पाए । यसैगरी कोषाध्यक्षमा २३६ मत सहित नेविसंघका सुरज बोलखे निर्वाचित भएका छन् । उनले अखिल क्रान्तिकारीकी प्राश्ना दोङलाई पराजित गरे । दोङले ११५ मत पाइन् । यस्तै सदस्यमा पनि मैनाली नेतृत्वका शिशिर ढकाल २६४ मत, नितेश भण्डारी २५६ मत, नितिश कुमार यादव २४८ मत, मुना सिकारी २४७ मत र अखिलेश कुमार यादव २३८ मतसहित निर्वाचित भएका छन् ।

सदस्यको प्रतिस्पर्धामा रहेका अखिल क्रान्तिकारी प्यानलका सुस्मिता थिङ १०९ मत, प्रमिला सिन्तान ११४ मत, स्वस्तिका सिन्तान १०५ मत, अस्मिता थोकर १०८ मत र प्रकाशमान गोलेले ८३ मत प्राप्त गरी पराजित भए। ६८५ जना मतदाता रहेको हेटौँडा क्याम्पसमा जम्मा ३७४ मत मात्रै खसेको थियो । मंगलबार सम्पन्न निर्वाचनको मतगणना रातिबाटै सुरु गरेर बुधबार बिहान सम्पन्न भएको सहायक क्याम्पस प्रमुख मनोज पोखरेलले जानकारी दिए । ।