कुलमानको पक्षमा हेटौँडामा वाइसियलको नेतृत्वमा प्रदर्शन

१२ चैत, हेटौँडा । सरकारले बदनियतपूर्ण ढंगबाट विद्युत प्राधिकरणका कार्यकारी निर्देशक कुलनमान घिसिङलाई हटाएको भन्दै हेटौँडामा पनि प्रदर्शन गरिएको छ । माओवादी केन्द्र निकट युवा संगठन योङ कम्युनिष्ट लिग (वाइसिएल)को नेतृत्वमा हेटौँडामा प्रदर्शन गरिएको हो ।

प्रदर्शनका क्रममा उनीहरुले हातमा ममबत्ति र टुकि बत्ति बालेर प्रदर्शन गरेका थिए । सरकारले बदनियत राखेर कुलमानलाई पदबाट हटाएको उनीहरुले आरोप लगाएका थिए । उनीहरुले तत्काल सरकारको निर्णय फिर्ता लिनुपर्ने माग गर्दै निर्णय फिर्ता नलिए त्यसबाट उत्पन्न परिस्थितिको जिम्मेवार सत्ता साझेदार दलहरु एमाले र कांग्रेस हुनुपर्ने चेतावनी समेत दिएका छन् ।

हेटौँडाको सिमाचोकबाट नारा जुलुस गर्दै निस्किएका उनीहरुले विद्युत माफियाका चंगुलमा फसेर सरकारले उज्यालो नेपालका नायक कुलमानलाई हटाइएको उनीहरुले आरोप लगाएका थिए । विरोध प्रदर्शन गर्ने क्रममा प्रदर्शनकारीहरूले प्रधानमन्त्री केपी शर्मा ओलीको पुतला समेत जलाएका छन् ।

प्रधानमन्त्री ओलीको पुतला जलाउने कार्य रोक्न खोज्दा सुरक्षाकर्मी र प्रदर्शनकारीबिच केहिबेर घम्साघम्सीसमेत भएको थियो । त्यस क्रममा प्रहरी निरीक्षक विमला कठायत घाइते भएकी छिन् । केहिबेरको प्रदर्शनपछि उनीहरुले बुद्धचोकमा कोणसभाको आयोजना गरेका थिए ।