पुलिसलाई निराश पार्दै एफिएफले उचाल्यो हेटौँडा गोल्डकपको उपाधि

२५ बैशाख, हेटौँडा । २०७९ यता घरेलु फुटबलमा अपराजित एपिएफले आफ्नो बिजयी यात्रालाई निरन्तरता दिएको छ । चारमहिना भित्र छैटौँपटक उपाधि जित्ने क्रममा उसले चिरपरिचित विभागीय प्रतिद्वन्दी नेपाल पुलिसलाई हेटौँडामा पनि निराश बनाएको हो ।

एपिएफले हेटौँडामा पहिलोपटक आयोजना भएको महिला राष्ट्रिय गोल्डकप फुटबल प्रतियोगिताको फाइनलमा पुलिसलाई टाईब्रेकरमा पराजित गरेको छ । १९ बैशाखबाट सुरु भएको प्रतियोगिता अन्तर्गत बिहीबार भएको फाइनलमा एफिएले पुलिसलाई टाईब्रेकरमा ३–१ गोल अन्तरले हराएको हो ।

एपिएफका लागि टाइब्रेकरमा गीता राना मगर, कप्तान अनिता बस्नेत र निशा थोकरले गोल गरे । रश्मि कुमारी घिसिङको प्रहार भने पुलिसकी गोलरक्षक उषा नाथले बचाउ गरिन् । यस्तै पुलिसका लागि गोलरक्षक उषाले मात्रै गोल गर्न सकिन् । पुलिसकी कप्तान निरु थापाको प्रहार एपिएफकी गोलरक्षक अञ्जना राना मगरले बचाउ गर्दा रेविका पाण्डेको प्रहार गोलपोष्टमा ठोकिएर बारिएको थियो । यस्तै सुस्मा तामाङको प्रहार पनि बाहिरिएको थियो ।

यसअघि खेलको निर्धारित समय बराबरीमा टुंगिएको थियो । दुबै टोलीले केहि गोल गर्ने राम्रा अवसर सदुपयोग गर्न नसक्दा खेलको नतिजा टाईब्रेकरसम्म पुगेको थियो । खेलको १५ औं मिनेटमा पुलिसकी मीना देउवाले पाएको राम्रो अवसर फितलो प्रहारका कारण एपिएफकी गोलकिपर अन्जना राना मगरले सजिलै बचाएकी थिइन् ।

यस्तै पहिलो हाफकै २७ औं मिनेटमा एफिएफकी रश्मिकुमारी घिसिङको प्रहार गोलपोष्टमा लागेर बाहिरिएको थियो । सविता राना मगरले दिएको बललाई रश्मिले पोष्टको दिशा दिएकी थिइन् । त्यसपछि पनि दुबैतर्फबाट गोलको प्रयास भएपनि गोल भने हुन सकेने । बिजेता भएसँगै एपिएफले ७ लाख रुपैयाँ र ट्रफि प्राप्त गरेको छ भने पुलिसले ५ लाख रुपैयाँ पाएको छ । यस्तै प्रतियोगिताभर नै उत्कृष्ट प्रदर्शन गरेकी एपिएफकी गोलरक्षक अञ्जना प्लेयर अफ दि म्याच घोषित भइन् । उनले नगद १० हजार रुपैयाँसहित ट्रफि प्राप्त गरिन् ।

सर्वोत्कृष्ट खेलाडी बनेकी रश्मिले पाइन स्कुटर
प्रतियोगिताको सर्वोत्कृष्ट खेलाडी बनेकी एपिएफकी रश्मि घिसिङले स्कुटर प्राप्त गरेकी छन् । प्रतियोगिताभर उत्कृष्ट प्रदर्शन गरेकी रश्मिले क्वार्टरफाइलनमा वीरगंजविरुद्धको खेलमा ह्याट्रिकसहित ५ र सेमिफाइनलमा संकटाबिरुद्ध एक गोल गरेकी थिइन् । उनलाई कांग्रेसका बागमती प्रदेश सभापति समेत रहेका प्रदेश सभा सदस्य इन्द्रबहादुर बानियाँले स्कुटर प्रदान गरे । प्रदेशसभा सदस्य बानियाँले नै प्रतियोगिताको सर्वोत्कृष्ट खेलाडीका लागि स्कुटर पुरस्कार प्रायोजन गरेका हुन् ।

प्रतियोगितामा एपिएफकै गोलरक्षक अञ्जना राना मगर, मिडफिल्डर रेनुका नगरकोटी र प्रशिक्षक जिवेश कुमार पाण्डे उत्कृष्टा घोषित भए । यस्तै पुलिसकी मिना देउवा उत्कृष्ट फरवार्ड र समीक्षा घिमिरे उत्कृष्टा डिफेन्डर घोषित भइन् । विधागत उत्कृष्ट भएका सबैले २५ हजार रुपैयाँ प्राप्त गरेका छन् । मकवानपुर जिल्ला फुटबल संघको आयोजनामा छैटौँ संस्करणसम्म सहिद स्मृति स्थानीय तह राष्ट्रिय गोल्डकप फुटबल प्रतियोेगिताको रुपमा पुरुष फुटबलका रुपमा हुँदै आएको प्रतियोगिता यसपटकबाट महिला फुटबल प्रतियोगिताको रुपमा आयोजना गरिएको हो ।

प्रतियोगिताका विजेता र उपविजेता टोलीलाई समापन कार्यक्रमका प्रमुख अतिथि प्रदेशसभा सदस्य इन्द्रबहादुर बानियाँ, प्रदेशका युवा तथा खेलकुद मन्त्री मीनकृष्ण महर्जन, हेटौँडाकी मेयर मिना कुमारी लामा लगाएतले पुरस्कार वितरण गरेका थिए । प्रतियोगितामा दुई विभागीय टोली एपिएफ र पुलिसको महिला टोली सहित आयोजक मकवानपुर, संकटा, बाराको जनजागृति युवा क्लब, रौतहट, चितवन र वीरगंजको महिला टोलीको सहभागीता रहेको थियो ।