कुलेखानी फाखेल हुमाने सडकमा मन्त्री मास्केले गरे आकस्मीक अनुगमन

८ जेठ, हेटौँडा । बागमती प्रदेशका भौतिक पूर्वाधार तथा विकास मन्त्री अमनकुमार मास्केले कुलेखानी(फाखेल(हुमाने सडकको आकस्मीक अनुगमन गरेका छन् । बिहीबार साँझ मन्त्री मास्केले सो सडकको स्थलगत अनुगमन गरेका हुन् । सडक बन्द गरेर स्तरोन्नती भइरहेको स्थानमा मन्त्री मास्केले अनुगमन गरेका हुन् । हेटौंडा–काठमाडौं जोड्ने उक्त सडक बागमती प्रदेश सरकारको लगानीमा असारअगावै सक्ने गरी स्तरोन्नती सहित कालोपत्र गर्ने काम भइरहेको छ ।

२ जेठबाट कालोपत्रे सुरु भएको उक्त सडकमा लापवाही ढंगबाट काम भएको गुनासो आएपछि मन्त्री मास्के आकस्मीक रुपमा अनुगमनमा पुगेका हुन् । सो सडक खण्डको हुमानेदेखि राकस खोलासम्म गरिएको कालोपत्रे उक्किएको भन्दै स्थानीयहरुले विरोध गरेका थिए । केही दिन अघि मात्र हालिएको उक्त कालोपत्रे उक्किएको भिडियो सामाजिक सञ्जालमा फैलिएपछि सडकको अवस्था बुझ्न मन्त्री मास्के आफै पुगेका हुन् । १९ दिनमा कालोपत्रे सक्ने गरी काम भइरहेको सो सडकमा रातको समयमा पनि कालोपत्रे हाल्ने काम भइरहेको थियो ।

पूर्वाधार विकास कार्यालय मकवानपुरका अनुसार जेठ १९ गतेसम्म काम सक्नुपर्ने र मौषम अनुकुल नहुँदा रातको समयमा पनि काम गराइएको थियो । विपद् प्रभावित उक्त सडकको असार अगावै काम सक्नेगरी निर्माण व्यवसायीलाई अधिकतम परिचालन गरी सडक कालोपत्रे गर्ने काम भएको कार्यालयका प्रमुख इन्जिनियर सुजन भण्डारीले जानकारी दिए ।

उनका अनुसार वर्षायाममा हेटौंडा काठमाडौं सहज यात्राका लागि सो सडक तयार गर्नेगरी विपदबाट क्षती पुगेका क्षेत्रमा समेत काम भइरहेको र कालोपत्रे गर्नुपर्ने स्थानमा छिटो काम सक्नेगरी अघि बढाइएको उनले बताए । कालोपत्रे हालिएको स्थानमा केही व्यक्तिहरुले साबेल प्रयोग गरी उकाउने र असारे विकास भन्दै विरोध गर्ने काम गरेको उनको दावी छ । सडक कालोपत्रसहित विपदले क्षति पुगेको स्थानको व्यवस्थापनको काम तीव्र गतिमा अघि बढाइएको उनको भनाई छ ।

१२.६ किलोमिटर लम्बाइ र ८.२० मिटर चौडाइ ९हुमानेदेखि कंलकी० सम्मको सडक कालोपत्रे गर्ने काम भइरहेको उनले जानकारी दिए । सडकको ८.५० किलोमिटर कालोपत्र तथा ४ किलोमिटर ढलान कार्य हुने उनले बताए । उनका अनुसार गत २०८० वैशाख १७ मा ३५ करोड ४८ लाख ८८ हजार ९१६ रुपैयाँमा सडक कालोपत्रका लागि सम्झौता गरिएको थियो । हाल सो सडक खण्डको २ कलिोमिटर सडक कालोपत्रे कार्य भइसकेको छ ।

अनुगमनका क्रममा मन्त्री मास्केले निर्माण भएका संरचनाको गुणस्तर कायम गर्ने विषयमा गम्भिर हुन निर्देशन दिएका छन् । गुणस्तरमा मन्त्रालयले कुनैपनि कम्प्रोमाइज नगर्ने उनले बताए । गत असोजमा गएको विपदमा बाढीका कारण कुलेखानी फाखेल हुमाने सडक सहित हेटौंडा काठमाडौं जोड्ने कुलेखानी सिस्नेरी दक्षिणकाली सडकमा समेत क्षती पुगेको थियो ।