प्रतिपक्षीको विरोधपछि बागमती प्रदेश सभा फेरि अवरुद्ध

२० असार, हेटौँडा । सहमती कार्यान्वयन नभएको भन्दै प्रतिपक्षी विरोधमा उत्रिएपछि बागमती प्रदेशसभाको बैठक पुनः अवरुद्ध भएको छ । बिहीबार सत्तारुढ दल र प्रतिपक्षबीच बजेट सम्बन्धी विषयमा भएको सहमति कार्यान्वयनमा समस्या देखिएपछि शुक्रबारको प्रदेशसभाको दोस्रो बैठक अगाडि बढ्न नसकेको हो ।

प्रदेशसभामा आर्थिक मामिला तथा योजना मन्त्री कुन्दनराज काफ्लेले प्रस्तुत गरेको विनियोजन विधेयक टेबुल गर्ने कार्यसूची तय भएपनि प्रमुख प्रतिपक्ष दल माओवादी केन्द्रले बिहीबारको सहमति कार्यान्वयन नभएको बताएपछि प्रदेशसभा बैठक अवरुद्ध भएको हो । माओवादी केन्द्रका प्रमुख सचेतक रत्न प्रसाद ढकालले सरकार सहमतिबाट पछि हटेको आरोप लगाउँदै सहमति कार्यान्वयन नभएसम्म संसद सञ्चालन नहुने स्पष्ट पारे ।

प्रमुख सचेतक ढकालका अनुसार सरकारले बिहीबारको सहमति सरकारबाट उल्घंन गरेपछि बैठक अवरुद्ध भएको हो । सहमति कार्यान्वयन नभएसम्म बैठक चल्न नसक्ने उनले चेतावनी दिएका छन् । प्रदेशसभा रोकेर केही बेर दलहरु बिच भएको बैठकमा समेत सहमति नजुटेपछि माओवादी केन्द्रले संसदको काम अघि बढ्न नसक्ने अडान लिएको उनको भनाई छ ।

शुक्रबारको बैठकमा विनियोजन विधेयक टेबुल गर्न ३० मिनेटका लागि प्रदेशसभा बैठक स्थगित गरिएको थियो । सो बिचमा केही समय दलहरुबीच छलफल भएपनि सहमति जुट्न नसकेको ढकालको भनाई छ । बैठकपछि बसेको दलहरुबीचको छलफल निष्कर्षविहीन बनेपछि प्रदेशसभा बैठक अवरुद्ध भएको हो । बैठक संचालन हुन नसकेको पछि प्रदेशसभा सचिवालयले सूचना टाँस गरेर शनिबार १ बजेसम्मका लागि प्रदेशसभा बैठक सारिएको छ ।

यसअघि पनि बजेट माथिको छलफलका क्रममा पटक–पटक प्रदेशसभा अवरुद्ध हुँदै आएको थियो । बजेटमाथीको छलफलका लागि १२ असारमा बोलाइएको बैठक १६ गतेसम्म सारिएको थियो । त्यसपछि १९ गतेबाट सुरु भएको बैठक पुनः अवरुद्ध भएको हो ।