चेपाङ संस्कृति संरक्षणमा प्रदेश सरकार तत्पर स् मन्त्री श्रेष्ठ

२२ भदौ, चितवन । बागमती प्रदेशका पर्यटन तथा संस्कृति मन्त्री सुरेश श्रेष्ठले चेपाङ समुदायको संस्कृति संरक्षण र प्रवर्द्धनका लागि प्रदेश सरकार सधैँ प्रतिबद्ध रहने बताएका छन् । चितवनको इच्छाकामना गाउँपालिका–६ कालिखोलामा आज आयोजित चेपाङ समुदायको मौलिक पर्व न्वागी विशेष सांस्कृतिक कार्यक्रमलाई सम्बोधन गर्दै मन्त्री श्रेष्ठले चिउरी, चमेरो र चेपाङ एकीकृत बस्ती जस्ता कार्यक्रमलाई निरन्तरता दिने आश्वासन दिए ।

‘हाम्रो संस्कार, संस्कृति, भाषा र भेषभूषा जोगाउन सकेनौँ भने अरूले जोगाइ दिँदैनन । त्यसैले यसलाई जीवित राख्न सरकारले विशेष प्राथमिकताका साथ काम गर्नेछ,’ मन्त्री श्रेष्ठले भने । उनले चेपाङ समुदायको भाषा संकटमा रहेकोतर्फ ध्यानाकर्षण गराउँदै ८४ हजारभन्दा बढी जनसंख्या भएको समुदायमध्ये आधाभन्दा कमले मात्र मातृभाषा बुझ्ने तथ्य गम्भीर रहेको उल्लेख गरे । ‘यो पहिचान जोगाउन मन्त्रालय निरन्तर सहयोग गर्नेछ,’ उनले जोड दिए ।

प्रदेश सरकारले भदौ २२ गते चितवन, मकवानपुर र धादिङ जिल्लामा सार्वजनिक बिदा दिई चेपाङ समुदायलाई सम्मान गरेको स्मरण पनि मन्त्री श्रेष्ठले गराए । कार्यक्रममा मन्त्रालयका सचिव दिपेन्द्र सुवेदीले बागमती प्रदेशभित्रका तमाम मूर्त तथा अमूर्त सम्पदाको संरक्षणमा मन्त्रालय प्रतिबद्ध रहेको जनाए । उनले चेपाङलाई पर्यटनको हब बनाउन सरकारले विभिन्न कार्यक्रम अघि बढाइरहेको बताए ।

यस्तै, नेपाल चेपाङ संघका अध्यक्ष गोविन्द चेपाङले अब समुदायको पहिचान र प्रवर्द्धनमा युवा पुस्ताले नेतृत्व लिनुपर्ने आवश्यकता औंल्याए । पूर्व भौतिक पूर्वाधार राज्यमन्त्री सन्तराम चेपाङले न्वागी पर्वलाई समुदायको जीवनशैली, संस्कृति र धार्मिक आस्थासँग गाँसिएको भन्दै यसको संरक्षणमा सबैको ध्यान आवश्यक रहेको बताए ।

चेपाङ समुदायमा नयाँ अन्न वा फलफूल पितृलाई अर्पण नगरी खान नहुने धार्मिक मान्यता रहेको छ । त्यसैले न्वागी पर्वका दिन घैया धान, काउनो, पिँडालु लगायतका अन्नपात तथा फलफूल पितृलाई चढाइने गरिन्छ । झाँक्री ९पान्दे०हरूले ढ्याङ्ग्रो बजाउँदै कुखुराको बली दिने, नातागोता भेला भई भोज खाने, नाचगान गर्ने परम्परा पनि यसै पर्वसँग जोडिएको छ ।

नेपालका छ जिल्लामा बसोबास गर्ने चेपाङ समुदायले पालैपालो यो पर्व विशेष रूपमा मनाउँदै आएका छन् । अघिल्लो वर्ष धादिङमा आयोजना गरिएको न्वागी पर्व यस वर्ष चितवनको इच्छाकामनामा सम्पन्न भएको हो ।