संसद् कब्जा प्रयासपछि ‘जेन-जी’ प्रदर्शन हिंसात्मक, मृत्यु हुनेको संख्या १५ पुग्यो 

२३ भदौ, हेटौंडा । ‘जेन-जी’ पुस्ताका नाममा सोमबार राजधानीमा भएको प्रदर्शन हिंसात्मक बन्दा ज्यान गुमाउनेहरूको संख्या १५ पुगेको छ।

प्रदर्शनकारी समूहले नयाँ बानेश्वरस्थित संसद् भवन कब्जा गर्न खोजेपछि सुरक्षाकर्मीले प्रतिकारस्वरूप गोली चलाएका थिए। घटनास्थलमै एकजनाको मृत्यु भएको छ भने बाँकीको उपचारको क्रममा विभिन्न अस्पतालमा ज्यान गएको हो।

स्वास्थ्य तथा जनसंख्या मन्त्रालयले सार्वजनिक गरेको विवरणअनुसार मृत्यु हुनेमध्ये ट्रमा सेन्टरमा ६, सिभिल अस्पतालमा ३, केएमसी अस्पतालमा २, त्रिवि शिक्षण अस्पतालमा १ र एभरेस्ट अस्पतालमा ३ जनाको मृत्यु भएको पुष्टि भएको छ।

मन्त्रालयले घाइतेहरूको उपचार निःशुल्क गर्न सरकारी अस्पताललाई निर्देशन दिइसकेको छ। अहिलेसम्मको तथ्यांकअनुसार सयौं घाइते विभिन्न अस्पतालमा उपचाररत छन्।

उता, घटनापछि राजधानीमा सुरक्षा सतर्कता बढाइएको छ। संसद् भवन परिसरलाई सुरक्षाकर्मीले घेराबन्दीमा राखेका छन् भने थप हिंसात्मक गतिविधि रोक्न काठमाडौं उपत्यकाका संवेदनशील क्षेत्रमा कडा निगरानी बढाइएको छ।