चितवनमा जापानीज इन्सेफ्लाइटिसका कारण मृत्यु हुनेको सङ्ख्या ६ पुग्यो

२२ असोज, हेटौँडा । चितवन जिल्लामा जापानीज इन्सेफ्लाइटिस ९जेई० को संक्रमण फैलिँदै जाँदा मृत्यु हुनेको संख्या ६ पुगेको छ । जनस्वास्थ्य कार्यालयका अनुसार साउन महिनादेखि हालसम्म सो रोगका कारण ६ जनाको मृत्यु भइसकेको छ ।

कार्यालयका किट नियन्त्रक राम केसीका अनुसार, पछिल्लो पटक खैरहनी नगरपालिका–४ की एक महिलाको मृत्यु भएपछि मृतकको संख्या ६ पुगेको हो । मृतकमध्ये दुई जना भरतपुर महानगरपालिका, एक जना खैरहनी नगरपालिका, दुई जना राप्ती नगरपालिका र एक जना कालिका नगरपालिकाका हुन् ।

कार्यालयका अनुसार हालसम्म जिल्लामा १७ जनामा जापानीज इन्सेफ्लाइटिसको संक्रमण पुष्टि भएको छ । संक्रमितमध्ये १० जना महिला र सात जना पुरुष छन् । तीन जना १५ वर्षमुनिका बालबालिका, पाँच जना १५ देखि ६० वर्ष उमेर समूहका र नौ जना ६० वर्षमाथिका रहेका छन् ।

मृत्यु भएकामध्ये एक ८९ वर्षका, अर्का ८१ वर्षका, दुई जना ७० वर्षका, एक जना ४२ वर्षीय र अर्को ३९ वर्षीय रहेका छन् । संक्रमित १७ जनामध्ये ७ जना भरतपुर महानगरभित्रका रहेको जनस्वास्थ्य कार्यालयले जनाएको छ ।

संक्रमितमध्ये १५ जनाले खोप नलगाएको र दुई जनाको खोप अवस्थाबारे जानकारी अस्पष्ट रहेको कार्यालयका किट नियन्त्रक केसीले जानकारी दिए । उनका अनुसार खोप नलगाउने समुदायमा संक्रमणको जोखिम उच्च देखिएको छ ।

जापानीज इन्सेफ्लाइटिस क्युलेक्स जातको पोथी लामखुट्टेको टोकाइबाट सर्ने कीटजन्य सरुवा रोग हो । यो लामखुट्टे प्रायः घर बाहिर बस्ने, साँझ र बिहान बढी सक्रिय हुने र सुँगुर, बङ्गुर तथा हाँसजस्ता पशुपक्षीलाई टोक्दा रोग सर्ने गर्छ ।

जनस्वास्थ्य कार्यालय चितवनका प्रमुख दिनेश रुपाखेतीका अनुसार धानखेतीमा पानी जम्ने स्थान र पशुपालन क्षेत्र यस रोगको जोखिमयुक्त क्षेत्र हुन् । “यो लामखुट्टेले धानबालीमा अण्डा पारेर लार्भा बनाउँछ, जसले संक्रमण फैलाउने सम्भावना बढाउँछ,” रुपाखेतीले बताए ।

स्वास्थ्य कार्यालयले उच्च जोखिम क्षेत्रका बासिन्दालाई लामखुट्टे नियन्त्रण, सरसफाइ र जेई खोप लगाउन आग्रह गरेको छ । साथै साँझ र बिहान लामखुट्टे टोक्ने समय भएकाले मच्छरदानि प्रयोग र शरीर ढाक्ने कपडा लगाउन अनुरोध गरिएको छ ।