तुइन खोला क्षेत्रमा राति ढुंगा खस्ने जोखिमपछि फ्लड लाइट जडान

३० फागुन, हेटौँडा । नारायणघाट–मुग्लिन सडकखण्डको तुइन खोला क्षेत्रमा सडक छेउमा फ्लड लाइट जडान गरिएको छ। रातको समयमा भिरबाट ढुंगा खस्ने जोखिम बढेपछि चालक तथा यात्रुलाई सतर्क गराउनका लागि फ्लड लाइट जडान गरिएको सडक डिभिजन कार्यालय भरतपुरले जनाएको छ।

बिहीबार परेको हिउँदे वर्षापछि तुइन खोलास्थित सडक माथिको भिरबाट ढुंगा खस्न थालेको थियो। यस क्षेत्र वर्षायाममा पनि पहिरोको उच्च जोखिममा पर्ने भएकाले यसअघि खसेको पहिरोका कारण लामो समयसम्म राजमार्ग अवरुद्ध भएको थियो।

सडक डिभिजन कार्यालयका अनुसार पुल नजिकैको भिरबाट जुनसुकै समयमा ढुंगा खस्न सक्ने सम्भावना रहेकाले रातको समयमा पनि स्पष्ट देखिने गरी सडक किनारमा दुई वटा फ्लड लाइट जडान गरिएको हो। यसले राति यात्रा गर्ने सवारी चालकलाई जोखिमयुक्त क्षेत्र पहिचान गर्न र सावधानी अपनाउन सहयोग पुग्ने अपेक्षा गरिएको छ।