प्रदेश प्रुमखबाट खेलकुद विकास संशोधन विधेयक प्रमाणिकरण

७ फागुन, हेटौँडा । बागमती प्रदेश प्रमुख दीपक प्रसाद देवकोटाले प्रदेश खेलकुद विकास ऐन, २०७५ लाई संशोधन गर्न बनेको विधेयक प्रमणिकरण गरेका छन् । प्रदेश प्रमुख देवकोटाले मंगलबार उक्त विधेयक प्रमाणिकरण गरेका हुन् । विधेयक प्रमाणिकरण गरेसँगै बागमती प्रदेशलाई १० औं राष्ट्रिय खेलकुद प्रतियोगितामा सहभागीताको लागि बाटो खुलेको छ ।

प्रदेश प्रमुख कार्यालय हेटौंडाकी शाखा अधिकृत निशा न्यौपानेका अनुसार उक्त विधेयक प्रदेशसभाको गत माघ २६ गतेको बैठकबाट पारित भई प्रमाणीकरणको लागि पेश भएको थियो । प्रदेश प्रमुख देवकोटाले नेपालको संविधानको धारा २०१ को उपधारा (२) बमोजिम प्रमाणीकरण गरेका हुन् । प्रदेश प्रमुख देवकोटाले प्रमाणिकरण गरेको सो विधेयक आन्तरिक मामिला तथा कानुन मन्त्रालयले राजपत्रमा प्रकाशन गरेसंगै कार्यान्वयनको चरणमा जानेछ ।

१० औं राष्ट्रिय खेलकुद प्रतियोगिताको लागि बाटो खुल्यो
प्रदेशसभाबाट पारित भएको उक्त संशोधन विधेयक प्रमाणिकारण तथा राजपत्रमा प्रकाशित नहुँदा दशौं राष्ट्रिय खेलकुद प्रतियोगिताको तयारी समेत प्रभावित भइरहेको थियो । प्रदेश खेलकुद विकास परिषद्हरुको बैठक राख्न, बजेट निर्माण तथा आकार बढाउन, १० औँ राष्ट्रिय खेलकुदको लागि बोर्ड बैठक राख्नलगायत खेलाडी र खेलकुद क्षेत्रको समग्र विकास तथा विस्तारको लागि आवश्यक काम गर्न समस्या हुँदै आएको हो ।

ऐन नहुँदा आगामी चैत २३ गतेदेखि हुने भनिएको १० औं राष्ट्रिय खेलकुद छनौट बन्द प्रशिक्षण तथा सहभागिता सम्बन्धी कार्यविधि २०८१ निर्माणमा समस्या रहेको छ । ऐन कार्यान्वयन पश्चात परिषदको पूर्ण बैठक राखेर दशौं राष्ट्रिय खेदकुदको तयारी लगायतका विषयमा छलफल गरी निर्णय गर्नुपर्ने युवा तथा खेलकुद मन्त्री मीनकृष्ण महर्जनले बताए । ऐन नहुँदा परिषदको बैठक बस्न नै समस्या भइरहेको उनको भनाई छ ।

ऐन नहुँदाको समस्याका बिच पनि मन्त्रालय र परिषदले आवश्यक तयारी भने गरी रहेको उनले बताए । उनका अनुसार राष्ट्रिय खेलकुद प्रतियोगिताको लागि अर्थ मन्त्रालयसंगको सहमतिमा हालसम्म करिव ९ करोड रुपैयाँ व्यवस्थापन भएको र अपुग रकम रकम निकासाको लागि तयारी भइरहेको छ ।

खेलकुद विकासका लागि सहयोग तथा अनुदान कार्यविधि २०८१, जिल्ला खेलकुद विकास समितिको कार्यालयमार्फत् विविध खेलकुद क्रियाकलाप सञ्चालन अनुदान कार्यविधि २०८१ र स्वयम्सेवक प्रशिक्षक परिचालन कार्यविधि २०८१ निर्माणमा समेत समस्या हुँदै आएको थियो ।

अन्तराष्ट्रिय खेलकुद प्रतियोगितामा पदक विजेता खेलाडीहरुलाई प्रोत्साहन गर्नको लागि नगदसहित सम्मान गर्नका लागि खेलाडी सम्मान कार्यक्रम कार्यविधि पनि निर्माणमा पनि उक्त ऐन महत्वपूर्ण रहने प्रदेशका मन्त्री महर्जनले बताए ।