पहिलो सहभागीमै चर्च ब्वाइजलाई बागमती गोल्डकपको उपाधी 

१२ फागुन, हेटौंडा । चर्च ब्वाइज युनाइटेडले पहिलो सहभागीतामै बागमती गोल्डकपको उपाधि जितेको छ । चर्च ब्वाइजले ७ औं संस्करणको पहिलो सहमागीतामै बागमती गोल्डकपको उपाधि उचालेको हो । सोमबार बागमती–४ स्थित सहिद स्मृति रंगशालामा भएको फाइनल खेलमा साविक विजेता मछिन्द्र क्लबलाई १–० गोलले निराश बनाउँदै चर्च ब्वाइजले उपाधी उचाल्यो ।

चर्च ब्वाइजलाई उपाधी दिलाउने क्रममा समीर तामाङ नायक बने । उनले खेलको ४७ मिनेटमा गरेको गोल नै निर्णायक बन्यो । खेलको म्यान अफ द म्याच गोलकर्ता तामाङनै घोषित भए । उनले १० हजार रुपैयाँ प्राप्त गरे ।

दुबै टोलीले उत्कृष्ट प्रदर्शन गरेको खेलमा थप गोल हुन नसक्दा खेल चर्च ब्वाइजले १–० ले जितेको हो । यसअघि चर्च ब्वाइजले विभागीय टोली एपीएफ र मछिन्द्रले थ्री स्टारलाई हराउँदै फाइनलमा स्थान बनाएका थिए ।

चर्च ब्वाइजले उपाधिसँगै पायो १० लाख 

उपाधीसँगै चर्च ब्वाइजले १० लाख रुपैयाँसहित ट्रफी प्राप्त गरेको छ । यस्तै उपविजेता बनेको साविक विजेता मछिन्द्रले ५ लाख रुपैयाँमा चित्त बुझायो । प्रतियोगिताको सर्वोत्कृष्ट खेलाडी चर्च ब्वाइजका सन्तोष खत्री घोषित भए । उनले नगद १ लाख १ हजार १०१ रुपैयाँ प्राप्त गरेका छन् ।

यस्तै प्रतियोगिताको उत्कृष्ट गोलरक्षक चर्च ब्वाइजका टेकेन्द्र थापा, डिफेन्डर मछिन्द्रका देवेन्द्र तामाङ, मिडफिल्डर मछिन्द्रका रोशन राना मगर, फरवार्ड चर्च ब्वाइजका समीर तामाङ र  प्रशिक्षक चर्च ब्वाइजका सुमन श्रेष्ठ घोषित भए । विधागत उत्कृष्ट सबैले जनही २५–२५ हजार रुपैयाँ प्राप्त गरेका छन् ।

प्रतियोगिता आयोजक गाउँपालिका खेलकुद विकास समितिले गाउँपालिकाको खेलकुद क्षेत्रको महत्त्वपूर्ण योगदान पु¥याएको भन्दै रेडियो झुरझुरेका स्टेसन म्यानेजर विवेक सिंतानलाई १५ राशीको उत्कृष्ट पत्रकारिता पुरस्कारबाट सम्मान गरेको छ ।

बागमती खेलकुद विकास समितिका अध्यक्ष रहर सिं थिङको सभाध्यक्षतामा भएको पुरस्कार वितरण कार्यक्रममा प्रमुख अतिथि बागमती प्रदेश सभाका सदस्य प्रेम बहादुर पुलामी, गाउँपालिका अध्यक्ष सर्केश घलान, उपाध्यक्ष फडिन्द्र कुमार तिमल्सिना लगाएतले विजेता र उपविजेता टोलीलाई पुरस्कार प्रदान गरेका थिए ।