२२ गतेबाट हुने राष्ट्रिय भेट्रान्स कपको खेल तालिका सार्वजनिक

२१ फागुन, हेटौँडा । २२ गते फागुनबाट हेटौँडामा हुने दशौं राष्ट्रिय भेट्रान्स कप एट ए साइड रनिङशिल्ड फुटबल प्रतियोगिताको खेल तालिका सार्वजनिक भएको छ । हेटौंडा भेट्रान्स क्लवको आयोजनामा हुने प्रतियोगितामा १५ वटा टोली सहभागीता पक्का भएको छ ।
प्रतियोगिताको उद्घाटन खेल साविक विजेता बानेश्वर फ्रेण्डसिप भेट्रान्स र वीरगञ्ज सिटीको बीचमा हुने आयोजक हेटौँडा भेट्रान्सका अध्यक्ष रमेशकुमार उप्रतीले जानकारी दिए । प्रतियोगितामा बानेश्वर र वीरगञ्ज सिटीसहित एविसी भेट्रान्स, भुटनदेवी भेट्रान्स खेलकुद विकास समिति, फ्रिडम फाइटर, चितवन, सिमरा, नागस्वती, बगर भाइखलक, किङकम, बुटवल, बौद्ध, वीरगञ्ज र हेटौँडा भेट्रान्स गरी १५ टिमको सहभागिता रहने भएको हो ।
२६ गतेसम्म हेटौँडाको हुप्रचौरमा हुने प्रतियोगिताको विजेताले एकलाख ५० हजार ५५५ र उपविजेताले ७५ हजार ५५५ रुपैयाँसहित ट्रफी प्राप्त गर्नेछन् । यस्तै सर्वोत्कृष्ट खेलाडीले १० हजार तथा अन्य विधागत उत्कृष्टले जनही नगद ५ हजार रुपैयाँसहित ट्रफी प्राप्त गर्ने आयोजक क्लवका अध्यक्ष उप्रेतीले बताए ।
प्रतियोगितामा ४५ वर्ष उमेर समूह माथिका खेलाडीहरुले मात्रै सहभागिता जनाउन पाउनेछन् । २०७२ सालदेखि रोटरी क्लव अफ मकवानपुरसँगको सहकार्यमा सुरु भएको भेट्रान्स कप एट ए साइड फुटबल प्रतियोगिताको अहिले दशौं संस्करण हुन लागेको हो । प्रतियोगिताको माध्यमबाट पूर्व खेलाडीको बीचमा सम्बन्ध विस्तार र भाइचाराको सम्बन्ध प्रगाढ बनाउनुको साथै पर्यटन प्रवद्र्धनमा समेत टेवा पुग्ने प्रतियोगिता संयोजक मणिराज गौतमले विश्वस व्यक्त गरे ।