तीज नारी शक्तिको सम्मानः प्रदेश प्रमुख देवकोटा

१० भदौ, हेटौँडा । बागमती प्रदेश प्रमुख दीपक प्रसाद देवकोटाले हिन्दु नारीहरूको महान् पर्व ‘हरितालिका तीज’लाई नारी शक्तिको सम्मान, प्रकृतिको संरक्षण र सामाजिक एकताको प्रतिकका रूपमा व्याख्या गर्दै सम्पूर्ण दिदीबहिनी तथा नेपाली समुदायलाई हार्दिक शुभकामना व्यक्त गर्नुभएको छ ।

विशेष सन्देश जारी गर्दै प्रदेश प्रमुख देवकोटाले तीज पर्वले नारी जीवनमा त्याग, समर्पण र आस्थाको संस्कारलाई जोड्ने मात्र नभई परिवार र समाजबीचको सम्बन्धलाई अझ प्रगाढ बनाउन योगदान गर्ने स्मरण गराउनुभएको छ । उहाँले भन्नुभयो, “सनातन वैदिक संस्कृतिमा आधारित यो पर्व नारी शक्तिको सम्मान र सामाजिक सद्भावको अमूल्य परम्परा हो ।”

पौराणिक कथाअनुसार, माता पार्वतीले भगवान शिवलाई पति पाउन कठोर तपस्या गर्दै निराहार व्रत बसेकी थिइन् । हिमालय पर्वतमा गरिएको यही तपस्याबाट प्रसन्न भई भगवान शिवले पार्वतीलाई पत्नीका रूपमा स्वीकार गरेको प्रसंग आज पनि तीज पर्वको मूल आधारका रूपमा स्मरण गरिन्छ । यही समर्पण र त्यागको सम्मानस्वरूप नारीहरूले तीज पर्वलाई श्रद्धा र उत्साहका साथ मनाउँदै आएको उल्लेख गर्दै प्रदेश प्रमुखले यसको धार्मिक, सांस्कृतिक र सामाजिक पक्षलाई जीवन्त राख्नु सबैको कर्तव्य भएको बताएका छन् ।

सन्देशमा उहाँले चेलीहरूले जन्मघरमा गएर दुःखसुख साट्ने, आत्मीयता बाँड्ने, नाचगान गर्ने र परिकार खाने परम्पराले दिदीबहिनीबीच आपसी प्रेम र आत्मीयता अझ प्रगाढ बनाउने विश्वास व्यक्त गर्नुभएको छ । पछिल्ला वर्षहरूमा देखिएको भड्किलो खर्च, देखासिकी र भड्काउ प्रवृत्तिबाट टाढा रहँदै पर्वको वास्तविक मूल्य र मर्यादालाई जोगाउन सबैलाई आह्वान पनि गर्नुभएको छ ।

“चाडपर्व, धर्म, संस्कार र परम्पराले दिएको गौरवलाई जोगाएर मात्र तीजजस्ता पर्वहरूले समाजलाई सकारात्मक दिशामा अघि बढाउन सक्छन्,” उहाँले उल्लेख गर्नुभयो ।

प्रदेश प्रमुख देवकोटाले तीज पर्वले राष्ट्रिय एकता, सामाजिक सद्भाव र मुलुकको समृद्धिमा महत्वपूर्ण योगदान पुर्‍याउने विश्वास व्यक्त गर्दै यसले समाजमा विद्यमान विकृति, विसङ्गति र विभाजनलाई हटाई समानता र न्यायमा आधारित समाज निर्माण गर्ने प्रेरणा दिओस् भन्ने शुभकामना गर्नुभएको छ ।

तीजलाई केवल चाडको रूपमा मात्र नभई नारी सशक्तीकरण, सांस्कृतिक संरक्षण र सामाजिक सहअस्तित्वको मूल्यवान् पर्वका रूपमा स्थापित गर्नुपर्नेमा प्रदेश प्रमुखले जोड दिनुभएको छ । साथै, उहाँले सम्पूर्ण दिदीबहिनीहरूको दीर्घायु, सुस्वास्थ्य र प्रगतिका लागि मंगलकामना गर्दै तीज पर्वले सबै नेपालीबीच एकता, प्रेम र सहिष्णुताको नयाँ सन्देश प्रवाहित गर्न सकोस् भन्ने आशा व्यक्त गर्नुभएको छ ।