१
१० भदौ, हेटौँडा । बागमती प्रदेशका मुख्यमन्त्री इन्द्रबहादुर बानियाँले हिन्दु महिलाहरूको महान् पर्व हरितालिका तीजले नारी एकता, पारिवारिक सुख–समृद्धि र सामाजिक सद्भावलाई मजबुत बनाउन महत्वपूर्ण योगदान दिने बताएका छन् ।
तीजको अवसरमा शुभकामना सन्देश जारी गर्दै मुख्यमन्त्री बानियाँले तीज पर्वले महिलाहरूलाई धार्मिक आस्था, सामाजिक संस्कार र सांस्कृतिक पहिचानसँग जोड्ने माध्यमको रूपमा रहेको उल्लेख गरेका छन् । ‘तीज पर्वले नारीलाई धार्मिक विश्वाससँगै आत्मबल, धैर्य र समर्पणको प्रेरणा दिन्छ । यस पर्वले पारिवारिक र सामाजिक जीवनमा एकता, प्रेम र सद्भावको वातावरण सिर्जना गर्दछ ।’
मुख्यमन्त्री बानियाँले तीज पर्वलाई मौलिक संस्कृति, मूल्य र परम्परा जोगाउने महत्वपूर्ण अवसरका रूपमा लिँदै पछिल्ला समयमा देखापरेका सामाजिक विकृति, विसङ्गति र भड्किलो खर्चजस्ता प्रवृत्तिबाट टाढा रहन सबैमा आह्वान गरेका छन् ।
‘यस पर्वले समाजमा विद्यमान लैङ्गिक, जातीय, वर्गीय भेदभाव र विभाजनलाई हटाई समानता, सहिष्णुता र मेलमिलापमा आधारित समाज निर्माण गर्ने प्रेरणा दिन्छ,’ उनको सन्देशमा भनिएको छ ।
मुख्यमन्त्री बानियाँले सम्पूर्ण नेपाली महिला दिदीबहिनीहरूलाई दीर्घायु, सुस्वास्थ्य र प्रगतिका लागि मंगलकामना गर्दै तीज पर्वले समाजलाई अझ एकताबद्ध र समावेशी बनाउन योगदान पुर्याओस् भन्ने शुभेच्छा पनि व्यक्त गरेका छन् ।
Hetauda Live ले समाचार, विचार, मनोरन्जन, खेल, विश्व, सुचना प्रविधि, भिडियो तथा जीवनका बिभिन्न आयामका समाचार र विश्लेषणलाई समेट्छ । मर्यादित समाज विकास र उन्नतीको पथमा अगाडी बढ्ने उदेश्यका साथ आवाज बिहीनहरुको आवाज बनेर बाहिर प्रस्फुटन हुन नसकेको सत्य तथ्य, निष्पक्ष समाचार संप्रेसण गर्न सधै प्रतिबद्धछौ । भ्रस्टाचार, अनियमितता सम्बन्धी कुनै अडियो भिडियो तपाई संग छ भने हामीलाई उपलब्ध गराउनुहोस र जिम्मेवार नागरिकको दायित्व पुरा गर्नुहोला, श्रोत गोप्य राखिने छ ।
