नेपालका सबै जातिय संस्कृति राज्यको निधिः प्रदेश प्रमुख देवकोटा

१६ फागुन, हेटौंडा । बागमती प्रदेश प्रमुख दीपक प्रसाद देवकोटाले शेर्पा समुदायको नयाँ वर्ष ‘ग्याल्पो ल्होसार’को अवसरमा शुभकामना व्यक्त गरेका छन् ।

विभिन्न जातजाति तथा भाषाभाषीयुक्त सम्प्रदाय रहेको नेपालमा सबैको संस्कृति राज्यको निधि भएको उल्लेख गर्दै उनले शुभकामना सन्देश सर्वाजनिक गरेका हुन् ।

प्रदेश प्रमुखको शुभकामना सन्देशमा ‘शेर्पा समुदायको नयाँ वर्ष (बाघ वर्ष) सुरु भएको अवसरमा देश तथा देश बाहिर रहेका सम्पूर्ण नेपाली दाजुभाई एवं दिदीबहिनीहरुमा सुख, शान्ति र समृद्धिको लागि शुभकामना व्यक्त गर्दछु’ उल्लेख गरिएको छ ।

शुभकामना सन्देशमा प्रदेश प्रमुख देवकोटाले भौगोलिक र प्राकृतिक रूपमा विविधतायुक्त हाम्रो देश नेपाल बहुजातीय, बहुभाषिक, बहुधार्मिक, बहुसांस्कृतिक विशेषताले भरिपूर्ण रहेको उल्लेख गर्दै ग्याल्पो ल्होसारजस्ता पर्व नेपाली राष्ट्रिय संस्कृतिको अभिन्न अंग भएको बताएका छन् ।

आपसी भाइचारा, सामाजिक सद्भाव, सहिष्णुता र एकता कायम राख्न पर्वले मद्दत पुर्‍याउने भन्दै प्रमुख देवकोटाले चाडपर्वका माध्यमबाट कायम हुने सामाजिक एकता तथा सद्भावलाई दिगो र दरिलो बनाउनु सबैको दायित्व भएको उल्लेख पनि गरेका छन्  ।

शुभकामना सन्देश मार्फत ग्याल्पो ल्होसार पर्वले नयाँ उत्साह र उमंग छर्दै आपसी एकता, सद्भाव र बन्धुत्वको भावना अभिवृद्धि हुन गई राष्ट्र थप सुदृढ बनाउन सघाउ पुगोस् भन्ने प्रदेश प्रमुख देवकोटाले कामना गरेका छन् ।