चोरमारास्थित गिरुवारी खोलाको पुल भाँचियो, पूर्व–पश्चिम राजमार्ग अवरुद्ध

३० बैशाख, हेटौँडा । नवलपुर जिल्लाको चोरमारा स्थित गिरुवारी खोलामा रहेको पुल भाँचिएपछि पूर्व–पश्चिम राजमार्ग पूर्ण रूपमा अवरुद्ध भएको छ। पुल भासिएर सवारी अवागमन अवरुद्ध भएपछि यात्रु र सवारी साधन अलपत्र परेका छन्।

जिल्ला प्रहरी कार्यालय नवलपुरका प्रमुख प्रहरी उपरीक्षक यादव ढकालका अनुसार, पुलको संरचना कमजोर भई भासिएको र अहिलेको अवस्थामा कुनै पनि सवारी साधन उक्त पुलबाट पार गर्न नसक्ने बताएका छन्। “पुल भासिएको कारण ठूलो दुर्घटना हुने जोखिम रहेकाले आवागमन पूर्ण रूपमा रोकिएको हो,” ढकालले भने।

पुलमा म.प्र.०३–००१ क ३१६३ नम्बरको १८ चक्के टेलर होङ्सी सिमेन्ट कम्पनीबाट कच्चा पदार्थ बोकी वीरगञ्जतर्फ जाँदै गर्दा पुलमाथि हिँड्ने क्रममा पुल भासिएको हो।

डाइभर्सन बनाउने प्रयास जारी रहे पनि तत्काल सम्भव नदेखिएको प्रहरीले जानकारी दिएको छ। प्रहरी निरीक्षक बन्जराले वैकल्पिक मार्ग प्रयोग गर्न समेत प्रहरीले सवारी चालक र यात्रुहरूलाई आग्रह गरेको बताए।

यसअघि गत पुस २६ गते पनि दुम्किवासस्थित बिनयी खोलाको पुल भाँचिएपछि बनाइएको डाइभर्सन दुई पटक खोलाले बगाउँदा यातायात अवरुद्ध भएको थियो।