मकवानपुरको कैलाश र बैकुण्ठमा होमस्टे सञ्चालन गरिने

२९ चेत, हेटौंडा । मकवानपुरको विकट गाउँपालिका कैलाशको वडा नम्बर २ स्थित बैकुण्ठ र कैलाशमा होमस्टे सञ्चालन गरिने भएको छ । पर्यटकीय क्षेत्रको रुपमा विकास गर्ने उद्देश्यले विभिन्न पूर्वाधारको विकास गर्दै आएको पालिकाले उक्त क्षेत्रमा होमस्टे सञ्चालन गर्ने भएको हो ।

ऐतिहासिक र धार्मिक महत्व बोकेको कैलाश र बैकुण्ठ क्षेत्रमा घुम्न आउने पर्यटकहरुको सहजताका लागि होमस्टे सञ्चालन गर्न लागिएको गाउँपालिकाका अध्यक्ष लोक बहादुर मोक्तानले बताए । उनले यस स्थानमा घुम्न आउने आन्तरिक तथा बाह्य पर्यटकहरुको बसाई लम्ब्याउनका लागि पनि खाना र आवासको व्यवस्थागर्न होमस्टे सञ्चालन आवस्यक भएको स्पष्ट पारे ।

जिल्लाकै विकट गाउँपालिका भएपनि प्रकृतिक रुपमा सुन्दर कैलाशको बैकुण्ठ र कैलाश क्षेत्र ऐतिहासिक र धार्मिक रुपले महत्वपूर्ण मानिन्छ । हालै मात्र गाउँपालिकाको आफ्नै खर्चमा साहासिक पर्यटनका लागि जिपलाईनको निर्माण गरिएको छ भने उक्त स्थानमा पर्यटकको आकर्षणका लागि डम्फु पार्क, डाँफे पार्कका साथै विष्णु कुण्डमा गुरु रिम्पोछेको प्रतिमा स्थापना गरिएको गरिएको छ ।

गाउँपालिकाका अध्यक्ष मुक्तानले होमस्टे सञ्चालनका लागि त्यहाँका स्थानीयलाई विभिन्न स्थानका होमस्टेको स्थलगत अवलोकन गराउँनुका साथै तालिम समेत दिइएको जानकारी दिए । होमस्टे सञ्चालन गर्ने स्थानका स्थानीयलाई चार दिने स्थलगत अवलोकन सँगै तीन दिने तालिम प्रदान गरिएको हो ।

होमस्टे सञ्चालन गर्ने स्थानीयहरुलाई वडा नम्बर २ का वडाध्यक्ष राजेन्द्र घिसिङ, वडा सचिव नितेशकुमार यादव, गाउँपालिका उद्यम विकास शाखा प्रमुख प्रमिला अर्याल सहितको टोलीले स्याङ्जाको सिरुबारीे, लमजुङको घलेगाउँ र गोरखाको वारपाक क्षेत्रका होमस्टेहरुको अवलोकन गराएका थिए ।

यस्तै स्थानीयलाई होमस्टे सञ्चालनका लागि प्रयोग गरिने घरको सजावट, पाहुनाको स्वागत सत्कार, विदाई, तथा ऐन नियमकाबारे जानकारी गराइएको वडा अध्यक्ष घिसिङले जानकारी दिए ।