६ केजी अफिम र ३ ग्राम खैरो हेरोइनसहित दुईजना पक्राउ

७ वैशाख, हेटौँडा । मकवानपुर प्रहरीले करिब ६ केजी अवैध लागुऔषध अफिम र ३ ग्राम खैरो हेरोइनसहित हेटौँडाबाट दुईजनालाई पक्राउ गरेको छ । प्रहरीले ५ किलो ९४० ग्राम अफिमसहित चितवन जिल्लाको राप्ती नगरपालिका– ११ का २५ वर्षीय बाबुराम तामाङलाई पक्राउ गरेको हो ।

तामाङलाई इलाका प्रहरी कार्यालय नेवारपानी मकवानपुरबाट खटिएको प्रहरी टोलीले आइतबार बिहान करिब ७ बजे पूर्व–पश्चिम राजमार्गअन्तर्गत हेटौँडा उपमहानगरपालिका– १९ नेवारपानीबाट नियन्त्रणमा लिएको मकवानपुर प्रहरीले जनाएको छ ।

चितवनबाट हेटौँडातर्फ आउँदै गरेको बा.प्र.०३–००१ ख २८८७ नम्बरको यात्रुवाहक बसमा सवार तामाङलाई उक्त परिणामको लागूऔषध अफिमसहित नियन्त्रणमा लिएको मकवानपुरका प्रहरी प्रवक्ता प्रहरी नायब उपरीक्षक श्यामु अर्यालले जानकारी दिए । उनका अनुसार तामाङले बोकेको झोलाभित्र लुकाएर राखेको अवस्थामा तीनवटा प्याकेटमा पाँच किलो ९४० ग्राम अफिम फेला परेको हो ।

यस्तै प्रहरीले अवैध लागूऔषध खैरोहिरोइन लिएर हेटौंडातर्फ आउँदै गरेका हेटौँडा ४ हुप्रचौरका विशाल सार्कीलाई पक्राउ गरेको छ । प्रहरी चौकी रातोमाटेको टोलीले उनलाई ३ ग्राम खैरोहिरोइन सहित पक्राउ गरेको हो । पूर्वपश्चिम राजमार्ग अन्तर्गत हेटांँडा १५ पिपलबोट नजिकै हेटौंडातर्फ आउँदै गरेको ना ६३ प ४८७ नम्बरको मोटरसाइकल जाँचका सार्कीले मोटरसाइकलको अगाडीको चक्कामा कभर राखेर प्लाष्टिकमा लुकाएर ल्याउँदै गरेको अवस्थामा ३ ग्राम खैरो हिरोइन फेला पारेका हो ।

अफिम र हेरोइनसहित पक्राउ परेका तामाङ र सार्कीलाई जिल्ला अदालत मकवानपुरबाट म्याद अनुमति लिएर आवश्यक अनुसन्धान प्रक्रिया अघि बढाइएको प्रहरी प्रवक्ता अर्यालको भनाई छ ।