बिपी राजमार्गको काभ्रे-खण्डमा आइतबारदेखि राति यातायात सञ्चालनमा रोक

२१ असार, हेटौँडा । बिपी राजमार्गअन्तर्गत काभ्रेपलाञ्चोक–सिन्धुली खण्डमा आइतबार ९असार २२ गते० देखि एक महिनाका लागि रातिको समयमा यातायात सञ्चालनमा रोक लगाइएको छ। जिल्ला प्रशासन कार्यालय काभ्रेपलाञ्चोकले मनसुन सक्रिय भई पहिरो तथा बाढीको जोखिम बढेको भन्दै साँझ ६ः३० बजेदेखि बिहान ५ बजेसम्म राजमार्ग बन्द गर्ने निर्णय गरेको हो।

कार्यालयद्वारा शुक्रबार जारी गरिएको सार्वजनिक सूचनामा काभ्रेभञ्ज्याङदेखि सिन्धुलीको सिमाना नेपालथोकसम्मको क्षेत्रमा उक्त निर्णय लागू हुने जनाइएको छ। जोखिम न्यूनीकरणका लागि यस्तो व्यवस्था गरिएको जनाइएको छ।

यसअघि पनि असार ७ गतेदेखि १५ दिनका लागि यही खण्डमा रातिको समयमा यातायात निषेध गरिएको थियो। सो निर्णय काभ्रे, सिन्धुली र रामेछापका सुरक्षा निकायहरूको समन्वयमा गरिएको हो। अबको निर्णय अनुसार रोक अवधि थपिएर एक महिनासम्म कायम रहनेछ।

काभ्रेपलाञ्चोकका प्रमुख जिल्ला अधिकारी उमेश ढकालका अनुसार वर्षा भइरहेका बेला बाढीपहिरोको सम्भावना उच्च भएकाले यस्तो निर्णय गरिएको हो। अब आइतबारदेखि काठमाडौँतर्फ आउने सवारी साधनलाई सिन्धुलीको सिमाना नेपालथोकमा र काठमाडौँबाट बाहिरिने सवारीलाई काभ्रेभञ्ज्याङमा रोक्ने व्यवस्था मिलाइनेछ।

गत वर्ष असोजमा आएको बाढीपहिरोले काभ्रेपलाञ्चोकको चौकीडाँडादेखि सिन्धुलीको बर्खेखोलासम्मको आठ किमी सडक बगाएको थियो। हालसमेत राजमार्गका विभिन्न खण्डहरूमा जोखिम कायमै रहेको डिभिजन सडक कार्यालय भक्तपुरले जनाएको छ।

डिभिजन कार्यालयका अनुसार बाढीपहिरोले बिपी राजमार्गको १६० किमीमध्ये सिन्धुलीको खुर्कोटदेखि नेपालथोकसम्मको ३४ किमी र नेपालथोकदेखि धुलिखेलसम्मको ५० किमी गरी ८४ किमी सडक खण्डमा बढी क्षति पुगेको छ। क्षतिग्रस्त सडक पुनर्निर्माणका लागि चारवटा खण्डमा छुट्टाछुट्टै ठेक्का प्रक्रिया अघि बढाइएको छ।