आज ३१ औँ विश्व आदिवासी दिवस, विभिन्न कार्यक्रमसहित मनाइँदै

२४ साउन, हेटौँडा । ३१ औँ विश्व आदिवासी दिवस आज नेपालमा पनि विभिन्न कार्यक्रम गरेर मनाइँदैछ । विश्वभरका आदिवासीहरूले तीन दशकदेखि मनाउँदै आएको यस दिवसलाई नेपालका आदिवासी जनजाति समुदायले विशेष उत्सवका रूपमा मनाउने गरेका छन् ।

यस वर्षको दिवसको अवसरमा नेपाल आदिवासी जनजाति महासङ्घले ‘प्राकृतिक स्रोत, जल, जमिन र जङ्गलमाथि आदिवासी जनजातिको अधिकार सुनिश्चित गर, यूएनड्रिप र आईएलओ १६९ सम्बन्धी सर्वोच्च अदालतको निर्देशनात्मक आदेश कार्यान्वयन गर’ भन्ने नारा तय गरेको छ ।

नेपालको संविधानले आदिवासीको प्रतिनिधित्व सुनिश्चित गरेपछि राज्यका विभिन्न निकायमा आदिवासी जनजातिको सहभागिता क्रमशः बढ्दो छ । मौलिक परम्परा र सांस्कृतिक पहिचानको संरक्षणमा आदिवासी जनजाति समुदायको भूमिकालाई महत्त्वपूर्ण मानिने भएकाले यस दिवसको अवसरमा उनीहरूको हक अधिकार र योगदानलाई स्मरण गर्ने गरिन्छ ।