दशैंको टिकापछि अति भारी वर्षाको चेतावनी, सतर्कता अपनाउन आग्रह

१४ असोज, हेटौंडा । जल तथा मौसम विज्ञान विभागले दशैंको टिकापछि केही जिल्लामा अति भारी वर्षा हुने सम्भावना रहेको भन्दै सतर्कता अपनाउन आग्रह गरेको छ । विभागले मंगलबार विशेष मौसम बुलेटिन जारी गर्दै असोज १७ देखि १९ गतेसम्म देशका विभिन्न भागमा ठूलो पानी पर्ने सम्भावना रहेको जनाएको हो ।

हाल मनसुनी वायु केही कमजोर भए पनि बंगालको खाडीमा विकसित न्यून चापिय प्रणाली भारतको ओडिसाबाट जमिनतर्फ प्रवेश गरी क्रमशः मध्य भारत सरिरहेको विभागले जनाएको छ । सो प्रणालीको प्रभावसँगै नेपालमा जलवाष्पयुक्त मनसुनी वायु प्रवेश गर्ने भएकाले दशैं अवधिभर मनसुनी गतिविधि सक्रिय रहने पूर्वानुमान गरिएको छ ।

असोज १७ (एकादशी) मा कोशी, बागमती, गण्डकी र लुम्बिनी प्रदेशका पहाड र तराई भू–भागमा हल्कादेखि मध्यम वर्षा र केही स्थानमा भारी वर्षा हुने सम्भावना छ।
असोज १८ (द्वादशी) मा कोशी, मधेश, बागमती, गण्डकी र लुम्बिनी प्रदेशका धेरै स्थानमा वर्षा हुने र थोरै स्थानमा भारीदेखि धेरै भारी वर्षा पर्न सक्ने अनुमान छ।
असोज १९ (त्रयोदशी) मा पनि यिनै प्रदेशका धेरै स्थानमा वर्षा भई केही ठाउँमा अति भारी वर्षा समेत हुने सम्भावना रहेको विभागले जनाएको छ।

यस अवधिमा संभावित वर्षाका कारण भू–क्षय, बाढी, पहिरो तथा सडक र हवाई यातायातमा अवरोध हुन सक्ने भएकाले मौसमको अध्यावधिक जानकारी लिएर आवश्यक सतर्कता अपनाउन विभागले सबैलाई आग्रह गरेको छ।