मुलुकभर भारी वर्षाको सम्भावना, उच्च सतर्कता अपनाउन आग्रह

१७ असोज, हेटौँडा । जल तथा मौसम विज्ञान विभागअन्तर्गत मौसम पूर्वानुमान महाशाखाले शनिबार र आइतबार मनसुनी वायु थप सक्रिय हुने भएकाले मुलुकका केही स्थानमा भारी वर्षा हुने चेतावनी दिएको छ । विभागले शुक्रबार साँझ विशेष मौसमी बुलेटिन जारी गर्दै प्रभावित क्षेत्रमा उच्च सतर्कता अपनाउन आग्रह गरेको हो ।

महाशाखाका अनुसार कोशी, मधेस, बागमती र गण्डकी प्रदेशका पहाडी तथा तराई भू–भागमा शनिबार र आइतबार धेरै स्थानमा वर्षा हुने सम्भावना छ । लुम्बिनी प्रदेशको तराई भू–भागमा पनि केही स्थानमा भारी वर्षा हुने अनुमान गरिएको छ । यस्तै, मधेस, बागमती र गण्डकी प्रदेशका पहाडी तथा तराई भू–भागका एक–दुई स्थानमा धेरै भारी वर्षा पर्ने सम्भावना रहेको उल्लेख छ ।

मौसमविद् प्रतिमा मानन्धरका अनुसार अहिले मुलुकभर बङ्गालको खाडी र अरब सागरबाट आएका जलवाष्पयुक्त मनसुनी वायुको प्रभाव छ । उनले भने, “शनिबार र आइतबार मुलुकका धेरै स्थानमा भारी वर्षा हुने देखिन्छ भने सोमबारदेखि मौसम क्रमिक रूपमा सुधार हुने सम्भावना छ ।”

आगामी तीन दिनको मौसम पूर्वानुमान

🔹 आज राति (शुक्रबार)
देशभर साधारणतया बदली रहनेछ । कोशी, बागमती, गण्डकी, लुम्बिनी र मधेस प्रदेशका केही स्थानमा मेघगर्जनसहित मध्यम वर्षा हुने अनुमान छ । साथै कोशी, मधेस, बागमती, लुम्बिनी र गण्डकी प्रदेशका एक–दुई स्थानमा भारी वर्षा पनि सम्भावित छ ।

🔹 शनिबार (दिउँसो)
देशभर सामान्यतया बदली रहनेछ । कोशी, मधेस, बागमती, गण्डकी र लुम्बिनी प्रदेशका पहाडी र तराई भू–भाग धेरै स्थानमा वर्षा हुने देखिन्छ । तीमध्ये केही स्थानमा मेघगर्जनरचट्याङसहित मध्यम वर्षा र केही स्थानमा भारीदेखि धेरै भारी वर्षा हुने पूर्वानुमान छ ।

🔹 शनिबार (राति)
कोशी, मधेस, बागमती र गण्डकी प्रदेशमा अधिकांश बदली रहनेछ । धेरै स्थानमा मेघगर्जनसहित वर्षा हुने सम्भावना छ भने मधेस, बागमती, गण्डकी र लुम्बिनीका तराई भू–भागमा भारीदेखि धेरै भारी वर्षा हुनसक्ने चेतावनी दिइएको छ ।

🔹 आइतबार (दिउँसो)
देशभर सामान्यतया बदली रहनेछ । कोशी, मधेस, बागमती, गण्डकी र लुम्बिनी प्रदेशका पहाडी तथा तराई भू–भागमा धेरै स्थानमा मध्यम वर्षा हुने सम्भावना छ । केही स्थानमा भारी वर्षा र कोशी, मधेस तथा बागमती प्रदेशका केही भू–भागमा धेरै भारी वर्षा समेत हुनसक्ने पूर्वानुमान गरिएको छ ।

🔹 आइतबार (राति)
कोशी, मधेस, बागमती लगायतका प्रदेशमा साधारणतया बदली रहनेछ । केही स्थानमा मध्यम वर्षा हुने देखिन्छ भने कोशी र बागमतीका पहाडी भू–भागका एक–दुई स्थानमा भारी वर्षा हुने सम्भावना छ ।

सतर्कता अपनाउन आग्रह

महाशाखाले भारी वर्षाको सम्भावना रहेकाले नदीमा पानीको सतह बढ्ने, पहिरो, बाढी तथा सडक यातायातमा अवरोध हुने जोखिम रहेको चेतावनी दिएको छ । प्रभावित क्षेत्रमा अनावश्यक यात्रा नगर्न, सुरक्षित स्थानमा बस्न र विपद् व्यवस्थापनका निकायले जारी गर्ने सूचनाप्रति सजग रहन पनि आग्रह गरिएको छ ।