शनिबारयता विपत्तिमा ५२ जनाको मृत्यु

१९ असोज, हेटौँडा । शनिबारदेखिको लगातारको वर्षा, पहिरो र चट्याङ लगायतका प्राकृतिक विपत्तिबाट देशभर ५२ जनाको मृत्यु भएको छ। सशस्त्र प्रहरी बलका अनुसार मृत्यु हुनेमध्ये कोशी प्रदेशमा मात्रै ४९ जनाको ज्यान गएको छ ।

कोशी प्रदेशभित्र सबैभन्दा बढी इलाम जिल्लामा ३७ जनाले ज्यान गुमाएका छन् । पहिरो, बाढी र घर भत्किँदा धेरै जनाको मृत्यु भएको जनाइएको छ। अन्य प्रभावित जिल्लाहरूमा पनि खोज तथा उद्धार कार्य जारी रहेको सशस्त्र प्रहरीले जनाएको छ ।

त्यस्तै, मधेश प्रदेशमा तीन र बागमती प्रदेशमा एकजनाको मृत्यु भएको छ। मधेशको रौतहटमा चट्याङ लागेर तीनजनाको ज्यान गएको हो भने बागमती प्रदेशको काभ्रेपलाञ्चोकमा सुक्खा पहिरोमा परेर एकजनाको मृत्यु भएको पुष्टि भएको छ । सशस्त्र प्रहरी बलका अनुसार विभिन्न स्थानमा अझै पनि बेपत्ता नागरिकहरूको खोजी कार्य भइरहेको छ ।

विपद् जोखिम न्यूनीकरण प्राधिकरण र स्थानीय प्रशासनहरूले उच्च सतर्कता अपनाउन आग्रह गरेका छन् । विपद्का घटनाले विशेषगरी पहाडी भूभागमा ठूलो जनधनको क्षति पुर्‍याएको र लगातारको वर्षाले उद्धार कार्यमा समेत कठिनाइ भएको अधिकारीहरूले बताएका छन् ।