वर्षा गराउने प्रणाली नेपालबाट बाहिरियो, मनसुन अझै केही दिन रहने

१९ असोज, हेटौँडा । ठुलो वर्षा गराउने न्यूनचापीय प्रणाली नेपालबाट बाहिरिएपछि देशभरको मौसममा सुधार आउने संकेत देखिएको छ। तर मनसुन भने अझै केही दिन सक्रिय रहने जल तथा मौसम विज्ञान विभागले जनाएको छ।

विभागले आइतबार सार्वजनिक गरेको प्रेस विज्ञप्तिमा असोज २० गते अपराह्नसम्म देशका नदी आसपासका क्षेत्रमा बाढी तथा पहिरोको जोखिम यथावत रहने उल्लेख गरेको छ। विभागका अनुसार शुक्रबारदेखि सक्रिय रहेको न्यूनचापीय प्रणाली भारततर्फ सरेसँगै ठूलो वर्षा घटेको हो।

सामान्यतया मनसुन नेपालबाट असोज १६ तिर बहिर्गमन हुने गर्छ, तर यो वर्ष त्यसमा केही ढिलाइ हुने विभागले जनाएको छ। कोशी र मधेश प्रदेशका केही जिल्लामा आइतबार पनि वर्षा भइरहेको छ भने अन्य प्रदेशहरूमा मौसम क्रमशः खुल्दै गएको छ।

मौसम पूर्वानुमान महाशाखाका अनुसार सोमबारदेखि कतिपय स्थानमा मध्यम मात्राको वर्षा भए पनि समग्रमा मौसममा सुधार आउने छ। विभागले नदी तटीय तथा पहाडी क्षेत्रका बासिन्दालाई अझै पनि सतर्क रहन आग्रह गरेको छ।